https://innews.az/uploads/news/2026-10/_innews_ad1a8e706cc84d739c42b35fa_o.jpg
Respublikamızda son günlərin əsas siyasi hadisəsi Yeni Azərbaycan Partiyasının VIII Qurultayının keçirilməsi oldu. Azərbaycan Prezidenti, Yeni Azərbaycan Partiyasının Sədri cənab İlham Əliyevin VIII Qurultayda söylədiyi proqram xarakterli nitq respublikamızın əsas prioritetlərini, dövlət siyasətinin strateji istiqamətlərini və yeni dövrün çağırışlarından irəli gələn vəzifələri aydın şəkildə ortaya qoydu.
Azərbaycanın müasir dövlətçilik tarixində YAP-ın xüsusi yeri var. Xalqımızın Ulu Öndər Heydər Əliyevə olan inamının və etimadının təcəssümü kimi 1992-ci ilin noyabr ayında təsis olunan partiya ilk gündən dövlətin və xalqın milli maraqlarını qorumağı özünün əsas siyasi məramı elan edərək qarşısında duran vəzifələri layiqincə yerinə yetirib. Partiyanın keçdiyi 34 ilə yaxın tarixi yol göstərir ki, onun siyasi fəaliyyəti ayrı-ayrı dövrlərin gündəlik məsələləri ilə məhdudlaşmayıb, Azərbaycanın uzunmüddətli inkişaf perspektivlərini müəyyən edən strateji məqsədlərlə müşayiət olunub. Ulu Öndər Heydər Əliyevin siyasi iradəsi və dövlətçilik fəlsəfəsi əsasında formalaşan bu siyasi xətt sonrakı mərhələdə Prezident İlham Əliyev cənabları tərəfindən yeni çağırışlara uyğun şəkildə davam etdirilib və daha da zənginləşdirilib. “Deyə bilərəm ki, partiyamızın fəaliyyəti, qəbul edilmiş qərarlar və siyasi xətti təkcə ölkəmiz üçün yox, bölgə üçün böyük önəm daşıyır. Yeni Azərbaycan Partiyası nəinki Azərbaycanın, Cənubi Qafqazın ən böyük siyasi qüvvəsidir. Müxalifət partiyası kimi yaransa da, 30 ildən çoxdur ki, partiyamız iqtidardadır. Ölkəmizin son illər ərzində uğurlu və şərəfli yolunda partiyamızın fəallarının çox böyük payı var, böyük töhfəsi var”, – deyə Prezident İlham Əliyev VIII Qurultayda nitqində bildirib.
Zaman keçdikcə YAP-ın sıralarının genişlənməsi, cəmiyyətin müxtəlif təbəqələrinin partiyanın fəaliyyətinə marağının artması onun ictimai-siyasi nüfuzunun göstəricilərindən biri kimi özünü göstərib. Bu gün 770 min nəfəri birləşdirən YAP Prezident İlham Əliyevin qeyd etdiyi kimi Cənubi Qafqazın ən böyük siyasi partiyasıdır. Xüsusilə gənclərin partiya sıralarına qoşulması siyasi varisliyin və dövlətçilik ənənələrinin yeni nəsillərə ötürülməsi baxımından böyük əhəmiyyət kəsb edir.
Qeyd etmək lazımdır ki, xalqımızın Ümummilli Lideri, müasir dövlətimizin qurucusu Heydər Əliyevin adı ilə bağlı hər bir siyasi hadisənin Azərbaycanın dövlətçilik tarixində xüsusi yeri var. Çünki bu hadisələrin hər biri respublikamızın yüksəlişində, müstəqilliyimizin qorunmasında, dövlətçiliyimizin əsaslarının möhkəmləndirilməsində böyük rol oynayıb. Bu baxımdan Prezident İlham Əliyevin YAP-ın təsis qurultayını Azərbaycanın qələbələrinin başlanğıcı kimi dəyərləndirməsi Heydər Əliyev siyasətinin və müasir tariximizin ən doğru şəkildə qiymətləndirilməsidir. Bəli, Azərbaycan müstəqillik illərində bütün uğurlarını məhz YAP-ın yaranmasından və Heydər Əliyevin xalqın istək və arzusu ilə siyasi hakimiyyətə gəlişindən sonra qazandı.
Heydər Əliyev hələ sovet dövründə həm respublikamıza rəhbərlik etdiyi, həm də Moskvada çalışdığı illərdə Azərbaycanın maraqlarını qətiyyətlə qorumuş, erməni separatizminin baş qaldırmasına imkan verməmişdi. Azərbaycanın bütün faciələri Heydər Əliyevə qarşı edilən haqsızlıqlardan sonra, ötən əsrin 80-ci illərinin sonlarında və 90-cı illərin əvvəllərində baş verdi. Bu baxımdan Prezident İlham Əliyev YAP-ın VIII Qurultayında söylədiyi “Əgər Heydər Əliyev o vaxt Azərbaycanda olsaydı, heç vaxt imkan verə bilməzdi ki, Azərbaycan xalqının başına bu oyunlar açılsın. Heç vaxt imkan verməzdi ki, separatizm meyilləri Qarabağda yer alsın” fikri özündə çox böyük tarixi həqiqət yükü daşıyır. Heydər Əliyev siyasi rəhbərlikdə olsaydı, dövlətimiz faciələr və ərazilərinin işğalı ilə üzləşməzdi.
Ona görə 1992-ci ildə Heydər Əliyevin liderliyi ilə YAP-ın yaranması respublikamızın və xalqımızın o dövrdə üzləşdiyi faciələr və siyasi böhranlar fonunda tarixi və sosial zərurət idi. Prezident İlham Əliyevin qurultayda vurğuladığı kimi Azərbaycan xalqı öz nicat yolunu ancaq Heydər Əliyevlə bağlayırdı. Heydər Əliyevin xalqın təkidli istək və arzusu ilə Bakıya gəlişi, 1993-cü il iyunun 15-də Ali Sovetin Sədri, oktyabrın 3-də isə Azərbaycan Prezidenti seçilməsi Ulu Öndərə olan ümumxalq inamının təzahürü idi. Həmin dövrdə müstəqil Azərbaycanda başlayan Heydər Əliyev siyasəti itirilməkdə olan müstəqilliyimizi xilas etdi, müasir dövlətçiliyimizin etibarlı və sarsılmaz təməllərini yaratdı.
Ulu Öndərin müstəqil Azərbaycana rəhbərlik etdiyi illər tariximizə respublikamızın sosial və iqtisadi inkişafının əsaslarının yaradıldığı, hüquqi dövlət quruculuğunun həyata keçirildiyi, beynəlxalq mövqelərimizin möhkəmləndirildiyi dövr kimi yazıldı. Heydər Əliyevin siyasi rəhbərliyə gəlişi ilə hakim partiyaya çevrilən YAP proqramında qarşıya qoyduğu vəzifələri uğurla yerinə yetirməyə başladı, siyasi-ictimai həyatın bütün sahələrində tərəqqiyə nail olmaq məqsədilə yüksək fəallıq nümayiş etdirdi, YAP Ulu Öndərin siyasi və ideoloji irsinin, inkişaf strategiyasının harmoniyasını özündə əks etdirməklə, ölkənin siyasi səhnəsinin ön cərgəsində özünə layiqli yer tutdu.
Azərbaycanın bu gün Prezident İlham Əliyevin rəhbərliyi ilə əldə etdiyi tarixi uğurlar göstərir ki, Heydər Əliyev siyasəti yaşayır və layiqincə davam etdirilir. Prezident İlham Əliyev qurultayda çıxışında bu barədə deyib:
“Bu siyasət 2003-cü ildən bu yana davam etdirilirdi, bu gün də davam etdirilir və bundan sonra da davam etdiriləcək. Bu barədə çox danışmaq istəməzdim, hər şey göz önündədir. Bu gün Azərbaycan beynəlxalq müstəvidə böyük hörmətə layiq olan ölkədir. Bir çox tanınmış ekspertlər və təhlilçilər Azərbaycanı artıq orta güc dövləti sırasına daxil edirlər. Bunun da bir çox parametrləri var. Biz iqtisadi müstəqilliyi tam təmin etmişik. Bu gün beynəlxalq aləmin çox dəyərli üzvüyük, öz taleyimiz öz əlimizdədir”.
Ötən 23 ilin mənzərəsi göstərir ki, qarşıda duran bütün milli vəzifələr tam yerinə yetirilib. Ən əsası torpaqlarımızın işğaldan azad edilməsi, ərazi bütövlüyümüzün bərpa olunması təsdiq edir ki, Azərbaycan bütün hədəflərinə uğurla çata bilən dövlətdir. Əlbəttə ki, bunun nəticəsidir ki, cənab İlham Əliyevin adı dünyanın ən nüfuzlu siyasi liderləri ilə bir sırada çəkilir. Azərbaycan isə Avrasiyanın orta güc statusunu qazanan dövlətidir.
Prezident İlham Əliyevin YAP-ın VIII Qurultayında etdiyi proqram xarakterli çıxış yalnız son 33 ilin uğurlu yekunlarının qiymətləndirilməsi və partiyanın gələcək fəaliyyət istiqamətlərinin müəyyənləşdirilməsi baxımından deyil, bütövlükdə Azərbaycanın siyasi, sosial-iqtisadi və geosiyasi hədəflərinin əsas konturlarının təqdim olunması baxımından mühüm əhəmiyyət daşıdı. Bu baxımdan dövlətimizin başçısı bir sıra vacib məsələlərə nəzər saldı, mühüm mesajlar verdi. Cənab Prezidentin toxunduğu məsələlər göstərdi ki, yeni mərhələdə dövlət siyasətinin əsas istiqamətləri təhlükəsizliyin və müdafiə qabiliyyətinin daha da gücləndirilməsi, ideoloji təhlükəsizliyin təmin olunması, müstəqil və fəal xarici siyasətin davam etdirilməsi, iqtisadi-maliyyə dayanıqlığının qorunması, enerji və nəqliyyat imkanlarının genişləndirilməsi, eləcə də Qarabağ və Şərqi Zəngəzurun bərpası kimi strateji vəzifələrdir.
Dövlət başçısının təhlükəsizlik məsələsinə xüsusi yer ayırması təsadüfi deyil. Bəli, biz müharibədə qələbə qazanmışıq və ərazi bütövlüyümüzü bərpa etmişik. Amma heç vaxt arxayınlaşmamalı və hər zaman güclü olmalıyıq ki, bir daha fitnə-fəsadla üzləşməyək. Bu gün dünyanın bir çox yerində, o cümlədən Azərbaycana yaxın coğrafiyalarda müharibələr baş verir. Belə bir şəraitdə Azərbaycan daha da güclü və istənilən təxribata cavab verməyə hazır olmalıdır.
Bütövlükdə, Prezident İlham Əliyevin YAP-ın VIII Qurultayında söylədiyi nitq ərazi bütövlüyümüzün bərpasından sonra qədəm qoyduğumuz mərhələdə Azərbaycanın strateji yol xəritəsi, yeni milli təhlükəsizlik konsepsiyası və ideoloji doktrinadır. Bu çıxışın ana xətti və əsas tezisi isə ondan ibarətdir ki, Azərbaycan daha da güclü olmalıdır. Çünki güclü olmaq Azərbaycanın gələcək inkişafının başlıca təminatıdır.
Xanlar Fətiyev,
Milli Məclisin deputatı
Ən son xəbərləri səhifəmizdən də izləyin
