https://innews.az/uploads/news/2026-10/_innews_dac048d973d35366571948b8e_o.jpg
Bu gün Bakıda FIFA-nın tarixdə ilk dəfə təşkil etdiyi U-15 Dünya Kuboku və Festivalına rəsmən start verilir.
Turnirin əsas məqsədi nəticə uğrunda mübarizə deyil, futbolun uşaqlar, yeniyetmələr və gənclər arasında populyarlaşdırılması, kütləviləşdirilməsidir.
Yarışın açılış mərasimi saat 19:00-dan etibarən Bakı Kristal Zalında təşkil olunacaq.
Bundan sonra - saat 19:30-da isə Azərbaycan və Şərqi Timor U-15 milliləri arasında matç başlayacaq.
Yarışda quruma üzv 189 ölkənin komandası iştirak edəcək. Bakıya futbolçular, məşqçilər və rəsmilər daxil olmaqla 4 minə yaxın iştirakçı gəlib.
Azərbaycan millisi “AF” qrupunda Andorra, Avstraliya, Haiti, İsrail və Şərqi Timor yığmaları ilə birlikdə yer alıb.
Çempionat çərçivəsində 1000-ə yaxın oyun təşkil olunacaq. Qarşılaşmaların əksəriyyətinin keçiriləcəyi Hövsan Yarış Kompleksində oyunların yüksək səviyyədə təşkili üçün bütün tədbirlər görülüb.
Qısa müddət ərzində inşa edilən kompleksdə 10 futbol meydançası 20 oyunun eyni anda keçirilməsinə uyğun hazırlanıb, həmçinin burada yarışın yüksək səviyyədə təşkili üçün bütün digər zəruri infrastruktur yaradılıb.
Xatırladaq ki, U-15 dünya çempionatı və festivalı oktyabrın 24-30 aralığında Hövsan Yarış Kompleksində baş tutacaq.
Turnirin açılış və final görüşləri Bakı Kristal Zalında keçiriləcək.
Yarış ənənəvi futboldan fərqli formatda təşkil olunacaq. Komandalar meydana 8 futbolçu ilə (8x8) çıxacaq. Hər qarşılaşma 20 dəqiqəlik iki hissədən ibarət olacaq. Meydanların ölçüsü 68x47 metr, qapılar isə standart ölçüdə – 7,32x2,44 metr olacaq.
FİFA-ya üzv olan 211 ölkədən 22-si Azərbaycanda keçiriləcək dünya çempionatında iştirak etməyəcək. Bunlara 18 Avropa nümayəndəsi, həmçinin ABŞ, Şimali Koreya, Eritreya və Liviya daxildir. Sonuncu iki komanda sentyabrdakı püşkatmadan sonra geri çəkilib.
55 Avropa ölkəsindən 37-si mundialın iştirakçısıdı. Ermənistan, Avstriya, Belçika, Danimarka, Farer adaları, Finlandiya, Almaniya, İslandiya, Lixtenşteyn, Hollandiya, Norveç, Rumıniya, San Marino, Serbiya, Sloveniya, İsveç, İsveçrə və Ukrayna Bakıya gəlməyib. Bu ölkələrin bəziləri FİFA-nın Rusiyanı da yarışa dəvət etdiyi üçün dünya çempionatında iştirak etməyən Ukraynaya dəstək vermək üçün belə addım atıb.
Əksər federasiyalar isə turnirin və formatın onların planlarına uyğun gəlmədiyini səbəb göstəriblər.
Ən son xəbərləri səhifəmizdən də izləyin