https://innews.az/uploads/news/2026-11/_innews_8db47c4962a093aba8524a0c5_o.jpg
Ana südü körpənin sağlam böyüməsi və inkişafı üçün əvəzsiz təbii qida mənbəyidir. Ana südü ilə qidalanma yalnız uşağın fiziki sağlamlığına deyil, həm də ana ilə körpə arasında emosional bağlılığın formalaşmasına, psixoloji rahatlığın təmin edilməsinə və təhlükəsizlik hissinin inkişafına mühüm töhfə verir.
Bu barədə “Peşəkar Psixoloqlar” İctimai Birliyinin təsisçisi və sədri, psixoloq və mediator Səbinə İsmayılova fikirlərini bölüşüb.
Səbinə İsmayılovanın sözlərinə görə, ana südü ilə qidalanma dövründə ananın psixoloji vəziyyəti və emosional rahatlığı xüsusi əhəmiyyət daşıyır. Ananın uzunmüddətli stress, narahatlıq və emosional gərginlik yaşaması onun ümumi rifahına, körpə ilə ünsiyyətinə və qayğı prosesinə təsir göstərə bilər.
O qeyd edir ki, əmizdirmə prosesi ana ilə körpə arasında yaxınlığın, sevgi və güvən hissinin möhkəmlənməsinə şərait yaradır. Bu zaman fiziki təmas, ananın səsi, baxışı və qayğıkeş münasibəti körpənin emosional inkişafında mühüm rol oynayır.
Psixoloq vurğulayır ki, süd verən ananın dəstəklənməsi yalnız onun şəxsi ehtiyacı deyil, bütövlükdə ailənin və yaxın ətrafın diqqət yetirməli olduğu məsələdir. Ananın gündəlik qayğılarının bölüşdürülməsi, ona emosional dəstək göstərilməsi və rahat mühitin yaradılması həm ana, həm də körpənin rifahına müsbət təsir edir.
Ana südü ilə qidalanmanın üstünlüklərindən danışan Səbinə İsmayılova bildirir ki, ana südü körpənin immun sisteminin və sinir sisteminin inkişafını dəstəkləyən mühüm qida komponentləri ilə zəngindir. Ümumdünya Səhiyyə Təşkilatının tövsiyələrinə əsasən, körpələrin həyatının ilk altı ayında yalnız ana südü ilə qidalanması, daha sonra isə əlavə qidalarla yanaşı əmizdirmənin davam etdirilməsi tövsiyə olunur.
Səbinə İsmayılovanın fikrincə, ana südü ilə qidalanmaya münasibətdə ailə üzvlərinin məlumatlı olması və anaya anlayışla yanaşması olduqca vacibdir. Xüsusilə ataların bu prosesdə dəstəkləyici rol oynaması ailədaxili münasibətlərin və valideynlik məsuliyyətinin güclənməsinə kömək edir.
Ana südü yalnız qida deyil, həm də ana ilə körpə arasında sevgi, güvən və emosional bağlılığın formalaşmasına xidmət edən xüsusi bir ünsiyyət prosesidir. Anaya göstərilən dəstək isə uşağın sağlam və təhlükəsiz inkişafına verilən töhfədir.
Səbinə İsmayılova
“Peşəkar Psixoloqlar” İctimai Birliyinin təsisçisi və sədri
Psixoloq və mediator
Ən son xəbərləri səhifəmizdən də izləyin
