JAMAL “Eurovision Asia”nın ilk gecəsində səhnəyə çıxıb

Azərbaycanlı ifaçı JAMAL ilk dəfə keçirilən “Eurovision Asia” beynəlxalq musiqi müsabiqəsinin açılış səhnəsində çıxış edib.

"innews media" xəbər verir ki, illərdir müzakirə olunan və reallaşması gözlənilən layihənin ilk buraxılışı Tailandın paytaxtı Banqkokda baş tutub. Böyük finalda Banqladeş, Butan, Kamboca, Laos, Malayziya, Monqolustan, Nepal, Filippin, Cənubi Koreya, Tailand və Vyetnam olmaqla 11 ölkənin təmsilçisi iştirak edib.

JAMAL ZOOP platformasında keçirilən beynəlxalq seçim nəticəsində müsabiqənin ilk buraxılışının rəsmi “Warm-Up Act” ifaçısı seçilib. O, əsas yarış başlamazdan əvvəl səhnəyə çıxaraq gecənin açılış performansını təqdim edib.

Azərbaycan iştirakçı ölkələr sırasında yer almasa da, JAMAL-ın beynəlxalq musiqi tədbirinin rəsmi proqramında təmsil olunması diqqət çəkib.

İfaçı gecədə sözləri və musiqisi İradə Babayevaya məxsus olan “Stereotype” adlı dinamik kompozisiyasını səsləndirib. Müasir səs texnologiyaları, güclü ritmləri və təsirli melodiyası ilə seçilən mahnının səhnə təqdimatında JAMAL-ı taylandlı rəqqaslar müşayiət ediblər.

Sənətçinin xüsusi səhnə obrazı isə tanınmış dizayner Farizə Mahmudova tərəfindən hazırlanıb.