logo
İbrahim Nəbioğlunun “Oxumaq və unutmaq paradoksu” kitabının təqdimatı keçirilib

İbrahim Nəbioğlunun “Oxumaq və unutmaq paradoksu” kitabının təqdimatı keçirilib

İbrahim Nəbioğlunun “Oxumaq və unutmaq paradoksu” kitabının təqdimatı keçirilib İbrahim Nəbioğlunun “Oxumaq və unutmaq paradoksu” kitabının təqdimatı keçirilib

“LIBRAFF” kitab mağazaları şəbəkəsinin “Park Akademiya” filialında Azərbaycan Jurnalistlər Birliyinin üzvü, Azərbaycanın Qara Dəniz İqtisadi Əməkdaşlıq Təşkilatının daimi təmsilçisi, texnika üzrə fəlsəfə doktoru İbrahim Nəbioğlunun “Oxumaq və unutmaq paradoksu” kitabının təqdimatı və imza saatı keçirilib.

Tədbirdə çıxış edən Milli Məclisin sədr müavini, Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynov kitabın müəllifi İbrahim Nəbioğlunun ziyalı, alim və maarifçi kimi fəaliyyətindən bəhs edib. O, tədbir iştirakçılarını bir araya gətirən əsas məqamın yalnız yeni kitabın təqdimatı deyil, həm də zəngin bilik və mütaliə mədəniyyətinə malik bir ziyalı ilə görüşmək imkanı olduğunu diqqətə çatdırıb.

Akademik Rafael Hüseynov “Oxumaq və unutmaq paradoksu” kitabının İbrahim Nəbioğlunun Azərbaycan və dünya elmi, ədəbiyyatı, mədəniyyəti, eləcə də ictimai düşüncəsi ilə bağlı araşdırmalarını, mülahizələrini və oxucu ilə bölüşmək istədiyi fikirləri özündə birləşdirən əsər olduğunu vurğulayıb. Qeyd edib ki, kitabın səhifələrində müxtəlif sahələrə aid biliklərin, tarixi faktların və görkəmli şəxsiyyətlər haqqında məlumatların yer alması onun maarifçilik missiyasını daha da gücləndirir.

O, İbrahim Nəbioğlunun yaradıcılığının mühüm xüsusiyyətlərindən birinin mürəkkəb elmi və intellektual məsələləri sadə, anlaşıqlı və maraqlı dillə təqdim etmək bacarığı olduğunu bildirib. Alimin sözlərinə görə, sadə yazmaq üçün çox bilmək, fikri aydın ifadə etmək üçün isə mövzunu dərindən mənimsəmək lazımdır. Aydın ifadə tərzi, ilk növbədə, aydın düşüncənin nəticəsidir. İbrahim Nəbioğlunun yazılarında da geniş məlumatlılıq, mütaliə zənginliyi və oxucuya bilik ötürmək istəyi aydın hiss olunur.

“Bu gün sürətlə dəyişən dünyada elmi və mədəni prosesləri izləmək üçün bilikləri əlçatan formada təqdim edən ziyalıların fəaliyyəti xüsusi əhəmiyyət daşıyır”, – deyə qeyd edən akademik Rafael Hüseynov bildirib ki, bu baxımdan İbrahim Nəbioğlunun həm kitabları, həm də sosial şəbəkələrdə yayımladığı yazılar maarifçilik baxımından dəyərlidir. O, müxtəlif elmi və mədəni hadisələr, dünya şöhrətli şəxsiyyətlər haqqında məlumatları geniş auditoriyaya çatdırmaqla oxucuların dünyagörüşünün zənginləşməsinə xidmət edir.

Akademik Rafael Hüseynov qeyd edib ki, maarifçinin əsas vəzifələrindən biri cəmiyyətdə mövcud olan bilik boşluqlarını aradan qaldırmaq, insanlara yalnız məlumat vermək deyil, həm də onları düşünməyə sövq etməkdir. Bu istiqamətdə İbrahim Nəbioğlunun yanaşmalarını yüksək qiymətləndirən alim müəllifin oxucuya hazır informasiya təqdim etməklə kifayətlənmədiyini, onu yeni mövzularla tanış etdiyini, fərqli düşüncə istiqamətlərinə yönəltdiyini və mütaliəyə maraq yaratdığını diqqətə çatdırıb.

Çıxışında kitabın müəllifinin peşəkar fəaliyyətinə də toxunan akademik Rafael Hüseynov onun Azərbaycan jurnalistikasında özünəməxsus yerinin olduğunu vurğulayıb. İbrahim Nəbioğlunun geniş dünyagörüşü, Azərbaycan dilinin imkanlarından məharətlə istifadə etməsi, fikirlərini auditoriyaya dolğun və təsirli şəkildə çatdırmaq bacarığı onun fərqləndirici xüsusiyyətləri kimi səciyyələndirilib. Akademik Rafael Hüseynov bu xüsusiyyətlərin elmi və mürəkkəb mövzuların geniş ictimaiyyətə təqdim olunmasında mühüm rol oynadığını bildirib.

Akademik Rafael Hüseynov, həmçinin İbrahim Nəbioğlunun 44 günlük Vətən müharibəsi dövründəki fəaliyyətinə diqqət çəkib. Qeyd edib ki, həmin günlərdə müəllif beynəlxalq televiziya kanallarında Azərbaycanı təmsil edən ekspert kimi fəal çıxış edib, ölkəmizin mövqeyini, baş verən hadisələrin mahiyyətini xarici auditoriyaya, o cümlədən türk dilində peşəkarlıqla çatdırıb. O, bu fəaliyyəti İbrahim Nəbioğlunun jurnalistlik təcrübəsinin, bilik və intellektual imkanlarının, eyni zamanda Vətənə bağlılığının təzahürü kimi qiymətləndirib.

Milli Məclisin sədr müavini vurğulayıb ki, Vətən müharibəsi dövründə baş verən hadisələrin, tarixi Zəfərin və həmin günlərdə müxtəlif sahələrdə fəaliyyət göstərən insanların əməyinin yaddaşlarda yaşadılması, gələcək nəsillərə çatdırılması vacibdir. Bu baxımdan İbrahim Nəbioğlunun kitabında yer alan şəxsiyyətlər və hadisələr haqqında yazılar yalnız ayrı-ayrı insanların fəaliyyətinin təqdimatı deyil, həm də dövrün ictimai və mənəvi mənzərəsinin qorunmasına xidmət edir.

Çıxışının sonunda Rafael Hüseynov müəllifin fəaliyyətini Azərbaycan maarifçilik ənənələrinin müasir dövrdə davamı kimi dəyərləndirib. O, İbrahim Nəbioğlu kimi elmə, kitaba, təhsilə və milli-mənəvi dəyərlərə bağlı ziyalıların cəmiyyət üçün əhəmiyyətini vurğulayaraq nəşrin oxucuları yeni biliklərə, mütaliəyə və düşünməyə təşviq edəcəyinə əminliyini ifadə edib.

Tədbirdə, həmçinin görkəmli violin ifaçısı, Xalq artisti, professor Zəhra Quliyeva, görkəmli musiqişünas, professor Həcər Babayeva, Anar Məmmədxanovun bacısı, Bakı Slavyan Universitetinin Dünya ədəbiyyatı kafedrasının müdiri, professor Naidə Məmmədxanova, Azərbaycan Jurnalistlər Birliyinin sədri, “Ayna-Zerkalo” qəzetinin baş redaktoru Elçin Şıxlı, Şərqşünaslıq İnstitutunun baş elmi işçisi, professor Solmaz Rüstəmova-Tohidi, filosof, bəstəkar, şair və naşir Rasim Müzəffərli, Xalq şairi Nəbi Xəzrinin oğlu Arzu Babayev, SİTA-nın İstanbuldakı sabiq xüsusi müxbiri Azər Cahangirov və digər qonaqlar kitab haqqında fikirlərini bölüşüblər. Çıxışlarda əsərin məzmunu, müəllifin zəngin mütaliə təcrübəsi və düşüncə tərzi, eləcə də kitabda qaldırılan məsələlərin aktuallığı diqqətə çatdırılıb. Oxumağın insan həyatındakı yeri, mütaliənin dünyagörüşünün formalaşmasına təsiri, yaddaş və unutmaq arasındakı mürəkkəb, eyni zamanda düşündürücü münasibət barədə dəyərli mülahizələr səsləndirilib. Nəşrin oxucunu yalnız məlumatlandırmadığı, həm də oxuduqlarını təhlil etməyə və biliklə insan yaddaşı arasındakı əlaqələr üzərində düşünməyə sövq etdiyi vurğulanıb.

Bundan başqa, təqdimat mərasimində “Qazax” Xeyriyyə İctimai Birliyinin sədri İlham Pirməmmədov ictimai birlik adından İbrahim Nəbioğlunu təbrik edərək, ona Fəxri Diplom təqdim edib.

Sonda nəşrin müəllifi İbrahim Nəbioğlu təqdimat mərasimində iştirak edən hər kəsə təşəkkürünü bildirib, “Oxumaq və unutmaq paradoksu” kitabını oxucular üçün imzalayıb.

footer
Top

Ən son xəbərləri səhifəmizdən də izləyin

innews media