https://innews.az/uploads/news/2026-11/_innews_f4d8c3d86d9817ad1206532b3_o.jpg
Azərbaycanda Amerika Ticarət Palatası (“AmCham Azərbaycan”) iqtisadiyyatın müxtəlif sahələrində fəaliyyət göstərən yerli və beynəlxalq şirkətləri bir araya gətirən biznes assosiasiyasıdır. Palata ölkədə işgüzar mühitin təkmilləşdirilməsi, biznes ictimaiyyətinin dövlət qurumları ilə dialoqunun inkişafı və beynəlxalq tərəfdaşlığın genişləndirilməsi istiqamətində fəaliyyət göstərir.
Palatanın nəzdində yaradılan Səhiyyə Komitəsinə rəhbərlik 2003-cü ildən fəaliyyət göstərən və Azərbaycanda Türkiyə Akkreditasiya Agentliyi (TÜRKAK) tərəfindən ISO 15189 standartı üzrə akkreditasiya olunmuş ilk tibbi laboratoriyaya malik “SAĞLAM AİLƏ” Tibb Mərkəzləri Şəbəkəsinin təsisçisi və baş direktoruna həvalə olunub. Vüqar Eyvazov özəl tibb müəssisələri şəbəkəsinin qurulması və idarə edilməsi, laboratoriya diaqnostikasının inkişafı və beynəlxalq keyfiyyət standartlarının tətbiqi üzrə uzunillik təcrübəyə malikdir.
Təyinatı ilə bağlı fikirlərini bölüşən komitə sədri bildirib ki, başlıca hədəf Azərbaycanda tibb sahəsində fəaliyyət göstərən özəl müəssisələri ortaq inkişaf gündəliyi ətrafında bir araya gətirmək və bu əməkdaşlıq əsasında sektorun qeyri-neft iqtisadiyyatında vahid klaster kimi formalaşmasına və tanınmasına nail olmaqdır. Klasterin formalaşması ilə yanaşı, iştirakçılar arasında məlumat mübadiləsini və birgə fəaliyyətin əlaqələndirilməsini təmin edəcək vahid informasiya sisteminin yaradılması da əsas hədəflərdəndir.
Onun sözlərinə görə, klaster yanaşması tibbi xidmətlərin, tibbi sığortanın, tibbi turizmin və əczaçılıq sektorunun, eləcə də tibbi avadanlıq və sərf materialları bazarının bir-birini tamamlayan istiqamətlər kimi inkişafına şərait yarada bilər. Yerli dərman istehsalının genişləndirilməsi və səhiyyə sektoruna xarici investorların cəlb edilməsi də bu gündəliyin əsas istiqamətlərindəndir.
Komitə sədri bu hədəflərə çatmaq üçün dövlət qurumları ilə özəl səhiyyə sektoru arasında dialoqun genişləndirilməsini vacib hesab edir. O qeyd edib ki, ölkədə səhiyyə sahəsində fəaliyyət göstərən assosiasiyalar və peşəkar birliklərlə müntəzəm fikir mübadiləsi aparmaq, onların beynəlxalq assosiasiyalarla əlaqələrini möhkəmləndirmək və birgə təşəbbüslər hazırlamaq komitənin fəaliyyətində mühüm yer tutacaq.
Mövcud vergi güzəştlərinin özəl səhiyyənin inkişafındakı rolunu yüksək qiymətləndirən Səhiyyə Komitəsinin hədəfi bu stimulların təsirini sektorun ehtiyaclarına uyğun olaraq daha da gücləndirməkdir. Özəl tibb müəssisələrinin, sahə assosiasiyalarının və peşəkar birliklərin iştirakı, aidiyyəti dövlət qurumları ilə dialoq əsasında vergi və gömrük mexanizmlərinin təkmilləşdirilməsinə, o cümlədən yeni tibbi avadanlıqların alınmasının stimullaşdırılmasına dair ortaq yanaşma formalaşdırılacaq. Vahid uçot sisteminin qurulması və nağdsız ödənişlərin təşviqi hesablaşmaların şəffaflığının artırılması istiqamətində artıq görülən işləri sürətləndirməyə xidmət edəcək. Tibbi hüquq sahəsində normativ çərçivənin təkmilləşdirilməsi də komitənin gündəliyinə daxildir.
Komitə sədri özəl tibb müəssisələrində beynəlxalq keyfiyyət və pasiyent məlumatlarının təhlükəsizliyi standartlarının tətbiqini tibbi turizmin inkişafının əsas şərtlərindən biri kimi dəyərləndirib. Bu baxımdan müəssisələrin beynəlxalq akkreditasiyaya, o cümlədən Joint Commission International (JCI) standartları üzrə qiymətləndirməyə hazırlığının dəstəklənməsi nəzərdə tutulur.
Komitə sədri vurğulayıb ki, Prezident İlham Əliyevin rəhbərliyi ilə həyata keçirilən genişmiqyaslı islahatlar, müasir tibb müəssisələrinin yaradılması və regionlarda tibbi xidmət imkanlarının genişləndirilməsi Azərbaycan səhiyyəsini keyfiyyətcə yeni inkişaf mərhələsinə yüksəldib. Onun sözlərinə görə, Azərbaycanda tibb sahəsində fəaliyyət göstərən özəl müəssisələrin də bu inkişaf xətti ətrafında sıx birləşməsi və əhalinin keyfiyyətli tibbi xidmətlərə çıxışının genişləndirilməsi naminə birgə fəaliyyət göstərməsi xüsusi əhəmiyyət daşıyır.
Ən son xəbərləri səhifəmizdən də izləyin