https://innews.az/uploads/news/2023-10/_innews_5d64abc942379239917b6da59_o.jpg
Kolumbiyanın ən nüfuzlu mətbu orqanı hesab edilən “Semana” jurnalında Azərbaycanın həmin ölkədəki səfiri Məmməd Talıbovun müsahibəsi əsasında “Nəhayət ki, ədalət qalib gəldi” başlıqlı məqalə dərc edilib.
Məqalədə lokal xarakterli antiterror tədbirlərinin Qarabağın erməni separatçılarının müstəqillik arzularına son qoyduğu və tarixi ədalətin bərqərar olduğu bildirlir. Məhz Azərbaycan tərəfinin 30 ilə yaxın müddətdə erməni işğalına məruz qaldığı, 100 minlərlə insanın öz doğma torpaqlarından didərgin salındığı bildirilir.
Diqqətə çatdırılır ki, Ermənistan silahlı qüvvələrinin və qanunsuz silahlı qruplaşmaların suveren Azərbaycan ərazilərində mövcudluğunu davam etdirməsi və həyata keçirdikləri saysız-hesabsız təxribat əməlləri 24 saatlıq antiterror tədbirlərini qaçınılmaz etmişdir. Antiterror tədbirlərinin nəticəsində qondarma rejimin silahları yerə qoyaraq təslim olduğu və Qarabağın erməni sakinlərinin nümayəndələri ilə Azərbaycanın mərkəzi hakimiyyətinin təmsilçiləri arasında reinteqrasiya prosesi ilə bağlı danışıqların davam etdirildiyi qeyd olunur. Azərbaycan Respublikasının Prezidentinin sözlərinə istinadən, Qarabağın erməni əhalisinin hüquqlarının və təhlükəsizliyinin təmin ediləcəyi əksini tapır.
Məqalədə Azərbaycanın Ermənistanla dialoqa hazır olduğu və regionda sülhün təmin olunması üçün səylərini əsirgəmədiyi vurğulanır. Sülh müqaviləsinin imzalanması, sərhədlərin delimitasiyası və bütün kommunikasiyaların, o cümlədən Zəngəzur dəhlizinin açılmasının regionun inkişafına əlavə təkan verəcəyi bildirilir.
Eyni zamanda, səfir M.Talıbovun Kolumbiyaya səfəri çərçivəsində bu ölkənin Konqresində və dövlət qurumlarında bir sıra görüşlər keçirdiyi, tərəflərin təhsil, elm, mədəniyyət, turizm, sərmayə qoyuluşu və digər sahələrdə əməkdaşlıq əlaqələrini daha da inkişaf etdirməkdə maraqlı olduğu bildirilir.
Qeyd edək ki, sözügedən müsahibə erməni xuntasının tam buraxılması xəbərindən bir gün əvvəl dərc edilib.
