"Arşın mal alan" və "Leyli və Məcnun" ilk dəfə Cenevrədə nümayiş olunub

“İçərişəhər” Dövlət Tarix-Memarlıq Qoruğu İdarəsinin nəzdində fəaliyyət göstərən Bakı Marionet Teatrının “Arşın mal alan” tamaşası İsveçrənin Cenevrə şəhərinin “Les Salons” teatrının səhnəsində uğurla nümayiş olunub.

Sənət əsəri teatrın bədii rəhbəri Tərlan Qorçunun yaradıcılığı ilə Bakı Marionet Teatrında səhnələşdirilərək marionet sənəti vasitəsilə Hacıbəylinin ölümsüz sənət əsərinə yeni nəfəs verib.

“Les Salons” Teatrının tamaşaçıları öncə “Leyli və Məcnun” marionet tamaşasının dekorasiya və kuklalarından ibarət sərgini ziyarət ediblər. Sərgidə Azərbaycan, Gürcüstan və Baltikyanı ölkələri təmsil edən ağacoyma ustalarından, kuklaları rəngləyən və bəzəyən rəssamlardan, geyim və dekorasiya ustalarından ibarət böyük beynəlxalq komandanın əl işləri nümayiş olunub. Daha sonra “Les Salons” Teatrının qədim zalında izləyicilər 20-ci əsrin əvvəllərinin Bakısına səyahət edib, Əsgərlə Gülçöhrənin səmimi sevgi axtarışından bəhs edən hekayə ilə tanış olublar.

Qeyd edək ki, qastrol səfəri Azərbaycanın zəngin tarixi, musiqi və teatr irsini təşviq edən “İrs” (Heritage) Mədəniyyət Assosiasiyasının təşəbbüsü və təşkilatçılığı ilə baş tutub.