https://innews.az/uploads/news/2024-05/_innews_ff25bde54c9d75157589f8f5f_o.jpg
Ankara Universiteti ilə Azərbaycanla bağlı layihələr həyata keçiriləcək, Azərbaycan-Türkiyə tarixinə dair tədqiqat əsərləri yaradılacaqdır.
Türkiyədəki Səfirliyimizin nəzdindəki Azərbaycan Mədəniyyət Mərkəzinin direktoru Samir Abbasov Türkiyənin Ankara Universitetinin rektoru, professor Necdet Ünüvar ilə görüşmüş və ikitərəfli əməkdaşlıq müzakirə edilmişdir.
Ankara Universitetində reallaşan görüşdə rektor Necdet Ünüvar Türkiyə-Azərbaycan qardaşlığı, dövlətlərimiz arasında sıx əməkdaşlıq haqqında danışaraq Ankara Dövlət Universitetinin Azərbaycanın aparıcı universitetləri ilə əməkdaşlıq əlaqələrinin qurulduğunu və daim Azərbaycanla əlaqələrin diqqət mərkəzində olduğunu qeyd edib. O, təməli Türkiyə Cümhuriyyətinin qurucusu Ulu Öndər Mustafa Kamal Atatürk tərəfindən qoyulmuş və 1946-cı ildə Cümhuriyyətin ilk Universiteti kimi yaradılan təhsil ocağının hazırda 19 fakültə olmaqla ölkə üçün yüksək səviyyəli mütəxəssislərin hazırladığını qeyd edib.
Rektor Necdet Ünüvar Azərbaycan xalqının Ümummilli lideri, Türk dünyasının dahi siyasətçisi Heydər Əliyevin Ankara Universitetini ziyarət etməsi, onun Azərbaycan-Türkiyə qardaşlığı, Türk dünyası arasında yaxınlıq üçün gördüyü işlərdən danışıb.
Samir Abbasov Azərbaycan milli mədəniyyəti, tarixi, dili və ədəbiyyatının tanıdılması və təbliği məqsədi ilə Prezident İlham Əliyevin Sərəncamı ilə qardaş ölkədə Azərbaycan Mədəniyyət Mərkəzinin yaradıldığını, Mərkəzin bu istiqamətdə Türkiyə universitetləri ilə əməkdaşlıq çərçivəsində birgə layihələr həyata keçirməyi nəzərdə tutduğunu söyləyib. O, Türkiyənin ilk və nüfuzlu Universitetlərindən olan Ankara Universitetinin Azərbaycan-Türkiyə münasibətləri ilə əlaqədar daim tədbir və layihələrdə öndə olduğunu qeyd edərək, Universitetin Azərbaycan universitetləri ilə əlaqələri, çoxsaylı azərbaycanlı tələbələrin bu təhsil ocağında təhsil almasından məmnunluğunu ifadə edib.
Samir Abbasov Azərbaycanın müstəqilliyinin memarı, “Bir millət – iki dövlət” şüarının müəllifi, Azərbaycan xalqının ümummilli lideri Heydər Əliyevin Azərbaycan-Türkiyə əlaqələrinin qardaşlıq səviyyəsinə yüksəlməsindəki müstəsna rolundan danışmış və gələcəkdə Universitetdə birgə layihə çərçivəsində Heydər Əliyev - Azərbaycanşünaslıq Mərkəzinin yaradılması təklifi ilə çıxış etmişdir. O, sözügedən Mərkəzdə Universitetdə təhsil alan azərbaycanlılardan ibarət Azərbaycan-Türkiyə qardaşlığı – tələbə gənclər təşkilatının qurulması və fəaliyyəti, habelə Ankara Universitetinin tarixçilərinin iştirakı ilə Azərbaycan-Türkiyə müttəfiqliyi, Qərbi Azərbaycanda Azərbaycan xalqının yaratdığı irs, mədəniyyət, tarix mövzusunda tədqiqat əsərinin işlənməsi, tədqiqat aparacaq redaksiya heyətinin alimlərinin Azərbaycanda beyin mərkəzlərində işləməsinə şərait yaradılması və s. təkliflər səsləndirib və onlara dair razılıq əldə olunub.
Sonda Ankara Universitetinin rektoru, professor Necdet Ünüvara Azərbaycan milli xalçası hədiyyə olunub.
Ən son xəbərləri səhifəmizdən də izləyin
