İstehsal olunduğu yer: Ağdam, Qarabağ

İstehsal olunduğu yer: Ağdam, Qarabağ İstehsal olunduğu yer: Ağdam, Qarabağ https://innews.az/az/news/id-33826

Qarabağa Böyük Qayıdışın ilkin mərhələsi icra olunur. Vətəndaşlarımız yenidən doğma yurd-yuvalarına geri qayıdırlar. Azərbaycan dövləti onların evlə təminatı və digər sosial infrastrukturu yaradıb, bununla yanaşı, insanların işlə təminatı mühüm amildir. Bu məsələdə isə ölkəmizin iş adamlarının üzərinə böyük vəzifələr düşür. Müsahibimiz, Ağdamda ayaqqabı fabriki açan sahibkar Emin Məmmədovdur.

- Emin bəy, sahibkarlıq sahəsində fərqlənən sahibkarların sırasında Sizin də “Tərəqqi medalı”na layiq görülməyiniz çox xoş oldu. Sahibkarlıq sahəsində müasir biznes yanaşmanız və xüsusən də Qarabağda iş qurmağınız xüsusilə təqdirə layiqdir. Təltif olunmağınız hansı hissləri yaratdı?

- Təşəkkür edirəm. İlk növbədə qalib bir ölkənin biznes adamı kimi bu mükafatı almaq çox böyük fəxarət hissidir. Cənab prezidentə öz təşəkkürümü bildirirəm və Sərəncamın yaratdığı məsuliyyət hissini qeyd etmək istərdim. Zəngin mədəni irsi ilə məşhur olan Qarabağ bölgəsinin infrastrukturunun bərpasında öz töhfəmizi verməkdən qürur duyuruq. Ağdamda qurduğumuz biznesə xüsusi həssaslıqla yanaşırıq və çalışdıq ki, istehsalat prosesini ən yüksək səviyyədə, müasir tələblərə uyğun quraq. Dövlətimizin bizə göstərdiyi etimadı layiqincə doğrulda biləcəyimizə əminik.

- Niyə Qarabağ və maraqlıdır ki, niyə ayaqqabı istehsalı?

-“Niyə məhz Qarabağ?” və “Niyə ayaqqabı?” suallarını əslində tez-tez eşidirik. Qarabağın iqtisadi bərpası dövründə Ağdam Sənaye Parkında yeni investisiyalar üçün geniş imkanlar yarandı. Biz Ağdamın iqtisadi inkişafına həm töhfə verməkdə, həmçinin bu ərazidə fəaliyyət göstərən rezidentlərə dövlət tərəfindən göstərilən dəstəkdən faydalanmaq üçün bu məkanı seçdik. Azərbaycan bazarında xüsusi qoruyucu işçi ayaqqabılarına tələbatı nəzərə alaraq, məhz bu istiqamət üzrə biznesin qurulmasına qərar verdik.

- Müəssisəni qurmaq üçün SKMF-dan güzəştli kredit almısınız. Biznes şərtləri, sahibkarlara yaradılan şəraitlə bağlı nə deyə bilərsiniz? Hansı məsələlərin həllində dəstəyə ehtiyacınız var?

- Daha öncə qeyd etdiyim kimi, Ağdam Sənaye Parkında biznesin səmərəli inkişafı üçün bir çox dəstək mexanizmləri mövcuddur. Müfaviq kreditlərin alınmasında olan güzəştləri də ehtiva edən bu təşviq mexanizmlərdən yararlana bildik. Hazırda milli brendimiz olan BAFCO markasının həm Azərbaycan bazarına, həm dünyaya tanıdılması üçün müəyyən addımların atılması müzakirə olunur. Bununla bağlı mövcud qurumlarla danışıqlar aparırıq. Xarici sərgilərdə iştirakımızla bağlı müəyyən dəstəyə ehtiyacımız var. Ümidvarıq ki, yaxın gələcəkdə Azərbaycanın adını ölkə xaricində də tanıda biləcəyik.

- Müəssisənin hazırkı istehsal gücü və real istehsal həcmi haqqında nə deyə bilərsiniz? Nə qədər işçi çalışır?

- Ayaqqabı sənayesində ən müasir texnologiyanın quraşdırıldığını nəzərə alsaq, müəssisəmizin illik ümumi istehsal gücü 510 000 cüt ayaqqabı təşkil edə bilər. Bu gün fabrikimizdə çalışanların sayı 40 nəfərdən çoxdur. Xarici ölkələrdən dəvət olunan mütəxəssislərdən başqa, bütün əməkdaşlar Ağdam rayonunun sakinləridir.

- Kadr baxımından çətinliyiniz varmı və əsasən hansı sahədə işçilərə tələb daha yüksəkdir?

- Azərbaycan Respublikasının Dövlət Məşğulluq Agentliyi və Qarabağ Peşə hazırlığı Mərkəzi ilə birgə əməkdaşlığımız sayəsində işçilərin axtarışında  çətinliyimiz yoxdur. Nəzərə alsaq ki, xüsusi ayaqqabı istehsalı ölkəmizdə o qədər də geniş yayılmayıb, bu sahədə ixtisaslaşmış mütəxəssisləri xaricdən dəvət edib yeni işə başlayan müdavimləri ilk növbədə təlimlərə cəlb edirik, işin incəliklərini öyrədirik. Daha sonra, müəyyən müddət keçdikdə, onları işçi kimi qeydiyyata alırıq.

- Artıq bir neçə məhsulunuz veb səhifənizdə sərgilənir. Maraqlı dizaynlar var. İlk müştəri hədəf kütləsi kimləri görürsünüz?

- Məhsullarımızın dizaynı özəl olaraq İtalyan şirkətinin dizaynerləri tərəfindən hazırlanıb. Hədəf kütləmiz - həqiqətən də keyfiyyətə önəm verən, işçilərinin sağlamlığının və komfortunu düşünən müəssisələrdir. Bu əsas mesajımızdır və onun əsasında da konseptimizi qurmağa çalışırıq.

- Təbii ki, hər bir müəssisə üçün xammal önəmli məsələdir və Azərbaycan uzun illər işlənməmiş dəri məhsullarının ixracatçısı olub. Xammal ilə yerli təminat hansı səviyyədədir?

- Bildiyiniz kimi, fabrikdə quraşdırılan  avadanlıqlar Almaniyadan sifariş olunub. Bu texnologiyalara müvafiq olaraq, xammal da həmçinin xarici ölkələrdən idxal olunur.

- Dəri məhsullarının daxildə emalının davam edərək son məhsula çevrilməsi son mərhələyədək qurula bilərmi?

- İstehsal prosesini ətraflı şəkildə izah etsək ilk mərhələ qəliblərə ayırıcı xammalın sıxılmasından başlayır. Növbəti mərhələdə dəzgah altlığı vurduqdan sonra qəlibin üzərinə üst hissəsi taxılır. Stansiya trim cıhazına yaxınlaşdıqda artıq qalan hissələri robot vasitəsilə təmizlənir. Orta altlıq hazır olduqdan sonra bir müddət ərzində sərtləşmə prosesi qedir. Bu bizim iş prosesimizin mərhələləridir.

Ümumilikdə xammal kimi dərinin emalına gəlincə, düşünürəm ki, bu sahədə də inkişaf güclənəcək. Bildiyimiz kimi, bazarı tələb və təklif amili formalaşdırır. Keyfiyyətli xammala ehtiyac varsa, keyfiyyətli dəri məhsullarının emalı da şərtdir. Buna görə də hesab edirəm ki, dəyər zəncirinin bu həlqəsinin qurulması öz həllini tapacaq.

- Satış strategiyanız necədir, yalnız daxili bazar, yoxsa ixrac planlarınız da varmı?

- Həm daxili, həm xarici bazarda məhsullarımızın layiqli yerini tutmacağından əminik. 

- Dünyada tanınmış ayaqqabı markaları həm də bir ənənəyə malikdirlər. BAFCO-nu sevdirəcək “marketinq xodu”nun biri aydındır – Ağdamda istehsal olunur. Potensial müştərilərinizə başqa hansı mesajları vermək istərdiniz?

- Biz inanırıq ki, ayaqqabı işi sadəcə bir istehsalat deyil, yüksək diqqət, səy və ustalıq tələb edən əsl sənətdir. Hazırladığımız hər bir cüt qoruyucu ayaqqabı diqqətli işin və mükəmməlliyə can atmağımızın nəticəsidir. Biz cəmiyyətə ən çətin şəraitlərdə təhlükəsizliyi və rahatlığı təmin edəcək keyfiyyətli qoruyucu ayaqqabının əhəmiyyətini çatdırmağa çalışırıq. Məqsədimiz sadəcə ayaqqabı yaratmaq deyil, həm də işimizə olan sonsuz sevgimizi, insanlara qayğımızı və ən yüksək keyfiyyət standartlarına sadiqliyimizi ifadə etməkdir.

- Fəaliyyətinizdə uğurlar arzulayırıq.

- Təşəkkür edirəm.
 

Mənbə: "Biznes Hıyatı" jurnalı