https://innews.az/uploads/news/2026-05/_innews_55bc9a6cf72626df3cea0e2f7_o.jpg
Bakıda keçirilən BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində müxtəlif dövlət və özəl qurumlar fəaliyyət istiqamətlərini əks etdirən stendlərlə təmsil olunurlar.
"innews media" xəbər verir ki, Bakı Olimpiya Stadionunda təşkil edilən beynəlxalq forumda iştirak edən qurumlar sırasında “Bakı Mexanizasiya Nəqliyyat” Açıq Səhmdar Cəmiyyəti də yer alır. Müəssisə forum iştirakçılarına fəaliyyəti, texniki imkanları və həyata keçirdiyi infrastruktur layihələri barədə ətraflı məlumat təqdim edir.
Müəssisənin tarixi 1924-cü ildən başlayır. Belə ki, qurum ilk olaraq “Qafqazenerjimontaj” Tresti adı altında fəaliyyət göstərib. Uzun illər ərzində Azərbaycanla yanaşı, Rusiyanın müxtəlif şəhərlərində filialları ilə fəaliyyət göstərən trest sənaye və infrastruktur layihələrinin icrasında mühüm rol oynayıb.
Daha sonra “Qafqazenerjimontaj” Trestinin nəzdində fəaliyyət göstərən Mexanizm və Nəqliyyat İdarəsinin bazasında həyata keçirilən struktur dəyişiklikləri nəticəsində, Azərbaycan Respublikasında dövlət əmlakının özəlləşdirilməsi üzrə II Dövlət Proqramına uyğun olaraq, 20 noyabr 2000-ci il tarixli sərəncam əsasında “Bakı Mexanizasiya Nəqliyyat” ASC yaradılıb.
Hazırda müəssisə ölkədə müxtəlif təyinatlı mühüm infrastruktur layihələrinin icrasında iştirak edir. Cəmiyyətin əsas fəaliyyət istiqamətlərinə yanacaq və su çənlərinin quraşdırılması, su bəndlərinin tikintisi, pirs və sahilboyu infrastruktur obyektlərinin inşası daxildir.
Forum çərçivəsində təqdim olunan stenddə müəssisənin ötən illər ərzində həyata keçirdiyi layihələr, istifadə olunan müasir texniki avadanlıqlar və şəhərsalma sahəsində qazandığı təcrübə ziyarətçilərin diqqətinə çatdırılır.
Qeyd edək ki, WUF13 kimi nüfuzlu beynəlxalq platformalarda yerli şirkətlərin təmsil olunması onların beynəlxalq əməkdaşlıq imkanlarının genişlənməsi, təcrübə mübadiləsinin gücləndirilməsi və Azərbaycanın şəhərsalma potensialının dünya ictimaiyyətinə təqdim edilməsi baxımından xüsusi əhəmiyyət daşıyır.
Ən son xəbərləri səhifəmizdən də izləyin
