“Haqqın 44 günü” tamaşası nümayiş olunub

Sentyabrın 25-də Lənkəran Dövlət Dram Teatrında Vətən müharibəsinin 44 günlük Zəfər salnaməsinə həsr olunmuş “Haqqın 44 günü” tamaşası nümayiş olunub.

Səhnə əsərində 44 günlük Vətən müharibəsində Azərbaycan Ordusunun qazandığı tarixi Zəfər, xalqımızın həmrəyliyi və Vətən uğrunda mübarizənin qəhrəmanlıq ruhu əksini tapıb. Tamaşada, həmçinin müharibənin insanların taleyində yaratdığı ağrı-acılara və ağır nəticələrə də toxunulub.

Tamaşanın müəllifi və quruluşçu rejissoru Anar Babalı, quruluşçu rəssamı Adil Əsədli, musiqi tərtibatçısı isə Fərahim Fərəcovdur.

Əsas rolları Səyad Əliyev, Gülər Kərimova, Şəbnəm Hüseynova, Aysel Babazadə, Saleh Əzimov, Məleykə Cəfərova, Teymur Hacızadə və Cəfər Səlimov ifa ediblər.

Tamaşa Vətən müharibəsinin qəhrəmanlıq salnaməsini və Zəfərin yaratdığı milli qürur hissini səhnə dili ilə tamaşaçılara çatdırıb.

Tamaşanı ictimaiyyət nümayəndələri ilə yanaşı, Lənkəran Şəhər İcra Hakimiyyətinin nümayəndələri və Qarabağ qaziləri də izləyiblər. Səhnə əsəri tamaşaçılar tərəfindən böyük maraq və coşqu ilə qarşılanıb.