https://innews.az/uploads/news/2026-09/_innews_c69ce1323e44a752583908a43_o.jpg
Rəqəmsal İnkişaf və Nəqliyyat Nazirliyinin dəstəyi ilə “Xsolla” şirkətinin Bakıda Tədqiqat və İnkişaf Mərkəzinin rəsmi açılışı baş tutub. Açılış mərasimində rəqəmsal inkişaf və nəqliyyat naziri Rəşad Nəbiyev və İnnovasiya və Rəqəmsal İnkişaf Agentliyinin rəhbərliyi iştirak ediblər.
Tədbir zamanı “Xsolla”nın Azərbaycanın oyun ekosisteminin inkişafına indiyədək verdiyi töhfələr müzakirə olunub. İKT sahəsində yeni iş yerlərinin yaradılması, İKT ixracının genişləndirilməsi, inkubasiya proqramları, hakatonların təşkili, eləcə də Azərbaycandan olan studiyaların aparıcı beynəlxalq konfranslarda iştirakına dəstək göstərilməsi vurğulanıb.
Bu xüsusda Bakıda Tədqiqat və İnkişaf Mərkəzinin fəaliyyətə başlaması Azərbaycanın rəqəmsal oyun ekosisteminin inkişafında mühüm mərhələ kimi qiymətləndirilib. Belə ki, şirkətin Bakıdakı Tədqiqat və İnkişaf Mərkəzində hazırda 79 əməkdaş çalışır. Onların 95 faizi proqram təminatının hazırlanması üzrə mütəxəssislərdir. Bu göstərici “Xsolla”nın Azərbaycanda yüksəkixtisaslı texniki kadr potensialının inkişafına verdiyi önəmi nümayiş etdirir.
Görüşdə həmçinin bildirilib ki, 2026-cı il ərzində “Xsolla”nın Bakıdakı fəaliyyəti çərçivəsində 1 inkubasiya proqramı və 3 hakaton təşkil edilib, 35 oyun və 15 “gametech” startapın yaradılması dəstəklənib, 14 studiyanın “Game Developers Conference Festival of Gaming”, “Digital Dragons”, Kölndə keçirilən “Gamescom” və “Pocket Gamer Connect Shanghai” daxil olmaqla aparıcı beynəlxalq tədbirlərdə iştirakı təmin edilib. “Xsolla” proqramlarında iştirak edən layihələrə ümumilikdə 100 min manata yaxın maliyyə dəstəyi təqdim olunub.
Rəqəmsal inkişaf və nəqliyyat naziri Rəşad Nəbiyev Azərbaycanın rəqəmsal iqtisadiyyatına sərmayə yatıran beynəlxalq texnologiya şirkətləri ilə əməkdaşlığın əhəmiyyətini vurğulayıb. O qeyd edib ki, “Xsolla”nın Azərbaycandakı fəaliyyəti ölkəmizin qlobal rəqəmsal oyun sənayesində mövqeyinin gücləndirilməsi məqsədinə xidmət edir və bu istiqamətdə müstəsna rol oynayır.
“Xsolla” ilə əməkdaşlıq Azərbaycanda yüksəkixtisaslı mütəxəssislərin yetişdirilməsinə, yerli kadr potensialının gücləndirilməsinə, İKT sektorunun inkişafına və rəqəmsal məhsul və xidmətlərin ixrac potensialının genişləndirilməsinə töhfə verəcək. Eyni zamanda, bu tərəfdaşlıq yerli oyun ekosisteminin dəstəklənməsi, innovativ startapların inkişafı və Azərbaycan oyun tərtibatçılarının beynəlxalq bazarlara çıxış imkanlarının artırılması baxımından mühüm əhəmiyyət daşıyır.
Ən son xəbərləri səhifəmizdən də izləyin
