https://innews.az/uploads/news/2026-09/_innews_531421b93a8b3af90b3cef8f2_o.jpg
Füzuli, "innews media" — Füzulidə yerləşən Aşağı Köndələnçay su anbarında avarçəkmə və kanoe üzrə “Mingəçevir Reqatası-2026” beynəlxalq turnirinin rəsmi açılış mərasimi keçirilib.
Açılış mərasimində Azərbaycan Respublikasının gənclər və idman naziri Fərid Qayıbov, Azərbaycan Su İdmanı Növləri Federasiyasının prezidenti Vüqar Əhmədov, eləcə də digər rəsmi şəxslər iştirak ediblər.
Gənclər və İdman Nazirliyi ilə Azərbaycan Su İdmanı Növləri Federasiyasının birgə təşkilatçılığı ilə keçirilən turnir sentyabrın 29-dan oktyabrın 1-dək davam edəcək.
Yarışın ilk mərhələsi Füzulidəki Aşağı Köndələnçay su anbarında təşkil olunub. Burada kayak və kanoe üzrə 200 metr məsafəyə yürüşlər keçirilib.
Turnirin açılış günü çərçivəsində Füzuli sakinləri, xüsusilə uşaqlar və yeniyetmələr üçün müxtəlif əyləncəli proqramlar, şoular və viktorinalar da təşkil olunub. İştirakçılara həvəskar kayak qayıqlarında avar çəkmək imkanı yaradılıb.
Reqatanın növbəti iki günü isə Mingəçevirdə yerləşən “Kür” Olimpiya Tədris-İdman Mərkəzində keçiriləcək. Bu mərhələdə bütün növlər və məsafələr üzrə yarışlar təşkil olunacaq və turnirin qalibləri müəyyənləşəcək.
“Mingəçevir Reqatası-2026”da Azərbaycanla yanaşı, Çexiya, Gürcüstan, Macarıstan, Qırğızıstan, Latviya, Litva, Moldova, Tacikistan, Türkiyə, Ukrayna və Özbəkistandan 100-dən çox idmançı iştirak edir.
Qeyd edək ki, Azərbaycan Su İdmanı Növləri Federasiyası 2022-ci ildən etibarən ölkənin müxtəlif su hövzələrində avarçəkmə və kanoe üzrə beynəlxalq yarışlar təşkil edir. Bu çərçivədə Suqovuşan və Köndələnçay su anbarlarında “Prezident Kuboku” və “Mingəçevir Reqatası” kimi turnirlər keçirilib.
Bu il isə ilk dəfə Sərsəng su anbarında beynəlxalq yarış təşkil olunub. Ümummilli Lider Heydər Əliyevin 103-cü ildönümünə həsr olunan “Prezident Kuboku-2026” reqatasının ilk günü Sərsəngdə keçirilib.
Ən son xəbərləri səhifəmizdən də izləyin
