“Mingəçevir Reqatası-2026”: Füzulidə ilk günün qalibləri mükafatlandırılıb

Füzuli, "innews media" — “Mingəçevir Reqatası-2026” beynəlxalq avarçəkmə və kanoe turnirinin Füzulidə keçirilən ilk yarış günü başa çatıb.

"innews media" xəbər verir ki, Gənclər və İdman Nazirliyi ilə Azərbaycan Su İdmanı Növləri Federasiyasının (AWSF) birgə təşkilatçılığı ilə keçirilən turnirin ilk günü Füzulidə yerləşən Köndələnçay su anbarında baş tutub.

Rəsmi açılış mərasimindən sonra yarışlara start verilib. İlk yarış günündə 1 nəfərlik kayak və kanoe qayıqları ilə 200 metr məsafəyə yürüşlər keçirilib və müxtəlif yaş kateqoriyaları üzrə qaliblər müəyyənləşib.

Azərbaycan təmsilçiləri ilk gündə 4 medal qazanıblar. Əlimurad Hacızadə (2008/2009) qızıl, Nuran Rəhimli (2008/2009) gümüş, Hüseyn Səmədli (2008/2009) və Elmir Tağıyev (2010/2011) isə bürünc medal əldə ediblər.

Qaliblərə medalları və mükafatları Azərbaycanın gənclər və idman naziri Fərid Qayıbov və Azərbaycan Su İdmanı Federasiyasının rəhbəri Vüqar Əhmədov təqdim ediblər.

Turnirdə Azərbaycanla yanaşı, Çexiya, Gürcüstan, Macarıstan, Qırğızıstan, Latviya, Litva, Moldova, Tacikistan, Türkiyə, Ukrayna və Özbəkistandan 100-dən çox idmançı iştirak edir.

“Mingəçevir Reqatası-2026”nın növbəti iki yarış günü Mingəçevirdə yerləşən “Kür” Olimpiya Tədris-İdman Mərkəzində keçiriləcək.