https://innews.az/uploads/news/2026-09/_innews_25b7855467f7e085fa508f1a0_o.jpg
Füzuli, "innews media" — Azərbaycan Su İdmanı Federasiyasının (AZSİF) yeni loqosu və rəsmi internet saytı təqdim olunub.
"innews media" xəbər verir ki, yeniliklər “Mingəçevir Reqatası-2026” beynəlxalq turnirinin Füzulidə keçirilən mərhələsindən sonra təşkil olunan mətbuat konfransında açıqlanıb.
Bildirilib ki, Azərbaycan Su İdmanı Növləri Federasiyası bundan sonra Azərbaycan Su İdmanı Federasiyası (AZSİF) adı ilə fəaliyyət göstərəcək. Federasiyanın fəaliyyət istiqamətləri də genişləndirilib. Belə ki, qurumun fəaliyyətinə yelkən və balıqçılıq idmanı növləri əlavə olunub.
Mətbuat konfransında qeyd edilib ki, yeni istiqamətlər üzrə müxtəlif layihə və yarışların keçirilməsinə başlanılıb. Balıqçılıq idmanı üzrə artıq iki yarış təşkil olunub. Onlardan biri “Cup Fishing”, digəri isə sazan balığı ovçuluğu üzrə yarış olub.
Şamaxının Çuxuryurd ərazisində keçirilən yarışların ekoloji tələblərə uyğun təşkil edildiyi bildirilib. Qeyd olunub ki, tutulan balıqlar zərər yetirilmədən yenidən suya buraxılıb. Bundan əlavə, Xəzər dənizində sahildən balıq tutma üzrə yarış da keçirilib.
Federasiyanın yeni vizual kimliyinin bir hissəsi kimi loqo və digər vizual elementlərdə də dəyişikliklər edilib.
Tədbirdə AZSİF-in rəsmi internet saytının da yeniləndiyi açıqlanıb. Bundan sonra federasiyanın rəsmi saytına azwatersport.az ünvanından daxil olmaq mümkündür. Federasiyanın sosial şəbəkə hesablarında da müvafiq dəyişikliklər edilib.
Mətbuat konfransında, həmçinin “Mingəçevir Reqatası-2026” beynəlxalq turnirinin Füzuli mərhələsində Azərbaycan komandasının nəticələrinin qənaətbəxş olduğu bildirilib. Qarşıdakı yarışlarda uğurlu nəticələrin davam etdiriləcəyi gözlənilir.
Ən son xəbərləri səhifəmizdən də izləyin
