Türkiyə konsulu: “Mingəçevir Reqatası” gələcəkdə dünya miqyasında nüfuz qazana bilər

Mingəçevir, "innews media" — “Mingəçevir Reqatası”nın gələcək illərdə beynəlxalq miqyasda daha böyük nüfuz qazanacağı və dünyanın müxtəlif ölkələrində yayımlanan turnirə çevriləcəyi gözlənilir.

"innews media" xəbər verir ki, bunu “Mingəçevir Reqatası-2026” beynəlxalq turnirinin ikinci gününü izləyən Türkiyənin Gəncədəki Baş konsulu Recep Öztop deyib.

Diplomat Türkiyə komandalarının yarışda iştirakına toxunaraq turnirin artıq həm Azərbaycanda, həm də beynəlxalq idman ictimaiyyətində ənənəvi xarakter aldığını bildirib.

“Türkiyə komandaları ildə iki dəfə buradakı yarışlara böyük həvəslə qatılırlar. Bu turnirlər Azərbaycanda və beynəlxalq aləmdə artıq ənənəvi xarakter alıb. Yarış böyük mübarizəyə səhnə olur”, — Recep Öztop deyib.

Baş konsul Türkiyənin “Mingəçevir Reqatası”nda iştirakından məmnunluq duyduğunu vurğulayıb.

“Türkiyə olaraq qardaş ölkədəki turnirdə hər zaman təmsil olunmaqdan böyük məmnunluq duyuruq. Növbəti illərdə də buradakı mübarizənin bütün dünyada yayımlanan və nüfuz qazanan bir yarış olacağına heç bir şübhəmiz yoxdur”, — diplomat əlavə edib.

Qeyd edək ki, oktyabrın 1-də başa çatacaq “Mingəçevir Reqatası-2026” turnirində Azərbaycanla yanaşı, Çexiya, Gürcüstan, Macarıstan, Qırğızıstan, Latviya, Litva, Moldova, Tacikistan, Türkiyə, Ukrayna və Özbəkistandan 100-dən çox gənc avarçəkən iştirak edir.