https://innews.az/uploads/news/2026-11/_innews_87fdaf47c80794cfab655db4c_o.jpg
Azərbaycan Respublikasının Gənclər Fondunun dəstəyi, Azərbaycanlı Tələbələr və Məzunlar Platformasının (ASAP) təşkilatçılığı ilə xarici ölkələrdə - Latviya, Amerika Birləşmiş Ştatları, Fransa, Böyük Britaniya və Macarıstanda 8 Noyabr - Zəfər Gününə həsr olunmuş silsilə tədbirlər keçirilib.
Latviyanın Riqa şəhərində 8 Noyabr – Zəfər Gününə həsr olunmuş tədbir keçirilib. ASAP-ın Riqa nümayəndəsi Sehri Sultanlının moderatorluğu ilə keçirilən tədbirdə çıxış edən Azərbaycan Respublikasının Latviya Respublikasında fövqəladə və səlahiyyətli səfiri Nərminə Mustafayeva və Azərbaycan Respublikası Gənclər Fondunun Gənclər təşkilatları ilə iş şöbəsinin əməkdaşı Zülfiyyə Yaqubova 44 gün davam edən Vətən müharibəsində Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərlik etdiyi şanlı Azərbaycan Ordusunun keçdiyi mübarizə və qəhrəmanlıq yolundan danışaraq ölkəmizin ərazi bütövlüyünün və suverenliyinin bərpa olunmasının tarixi əhəmiyyətini vurğulayıblar. Daha sonra Zəfər Gününə həsr olunmuş videoçarx nümayiş etdirilib, milli musiqi və rəqs nümunələri təqdim olunub, o cümlədən Latviyada təhsil alan azərbaycanlı tələbələrlə tarixi qələbənin əhəmiyyəti barədə müzakirələr aparılıb.
ABŞ-nin Nyu-York şəhərində 8 Noyabr - Zəfər Günü ilə əlaqədar “Zəfərdən Gələcəyə: Gənclər, İnkişaf və Yeni İmkanlar” adlı tədbir keçirilib. Tədbirdə açılış nitqi ilə çıxış edən Azərbaycanın BMT yanında Daimi Nümayəndəliyinin birinci katibi Cavid İsmayılov Müzəffər Ali Baş Komandan İlham Əliyevin rəhbərliyi ilə Azərbaycan Ordusunun qazandığı tarixi Zəfərin əhəmiyyətindən bəhs edib. ASAP-ın Nyu-York nümayəndəsi Elman Gözəlovun moderatorluğu ilə keçirilən panel müzakirəsində Bakı Dövlət Universitetinin assistant professoru, 2026 Fulbright Faculty Development Program təqaüdçüsü, Nyu-York Universitetinin assistant professoru Zərifə Nəzirli və ASAP-ın İdarə Heyətinin üzvü, eyni zamanda Rochester Universitetinin Simon Biznes Məktəbində Süni intellekt və Biznes Analitikası üzrə magistratura təhsili alan Günay Bayramova gənclərin inkişafı, beynəlxalq təhsil imkanları və gələcək perspektivləri ilə bağlı fikirlərini bölüşüblər. Bədii hissədə isə musiqiçi Jeffrey Werbock tərəfindən Azərbaycan milli musiqilərindən ibarət xüsusi musiqi proqramı təqdim olunub. Daha sonra Qarabağın müharibədən əvvəlki və hazırkı vəziyyətini əks etdirən foto sərgi nümayiş etdirilib. Sərgi iştirakçılara bölgədə aparılan bərpa və quruculuq işlərini müqayisəli şəkildə görmək imkanı yaradıb.
Böyük Britaniyanın London şəhərində Zəfər Gününə həsr olunmuş “Birlik irsi: Birgə təsir üçün gənclər dialoqu” adlı panel müzakirəsi keçirilib. Böyük Britaniyada təhsil alan azərbaycanlı tələbələr, gənc mütəxəssislər, o cümlədən Kembric Universitetinin professoru, görkəmli azərbaycanlı alim Qərib Mürşüdovun iştirak etdiyi tədbirdə çıxış edən Azərbaycanın Böyük Britaniyadakı səfiri Elin Süleymanov soydaşlarımızı 8 Noyabr – Zəfər Günü münasibətilə təbrik edərək, bu tarixin müasir Azərbaycan tarixindəki müstəsna əhəmiyyətindən danışıb. Səfir 2020-ci ildə Prezident, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində qazanılan tarixi Qələbənin şəhidlərimizin və qazilərimizin qəhrəmanlığı, xalqımızın birliyi və həmrəyliyi sayəsində əldə olunduğunu vurğulayıb. Tədbir çərçivəsində gənclərin beynəlxalq əməkdaşlıq imkanları, xaricdə təhsil və karyera perspektivləri, eləcə də Azərbaycanın beynəlxalq müstəvidə təmsil olunmasında onların rolu ətrafında fikir mübadiləsi aparılıb. Çıxışlarda xaricdə təhsil alan azərbaycanlı tələbələrin üzləşdikləri imkanlar və çətinliklər, peşəkar inkişaf yolları, beynəlxalq mühitdə Azərbaycanı layiqincə təmsil etməyin əhəmiyyəti barədə fikirlər səsləndirilib. ASAP-ın London nümayəndəsi Səbinə Abışovanın moderatorluğu ilə keçirilən tədbirdə gənclər arasında əlaqələrin gücləndirilməsinin, onların birgə təşəbbüslərdə fəal iştirakının vacibliyi vurğulanıb.
Fransanın Tuluza şəhərində Zəfərimizin 6-cı ildönümü münasibətilə “Zəfərə Doğru: Xatirədən Sabaha” adlı keçirilib. Tədbir zamanı Azərbaycan Respublikasının Paris şəhərində yerləşən Mədəniyyət Mərkəzinin rəhbəri İsa Məmmədov, Tuluzadakı Azərbaycan Evinin vitse prezidenti Rza Mövsümov, AYNF-nin idarə heyətinin rəhbəri Səidə Namazova, eləcə də ASAP nümayəndələri Arzu Eyyubova və Nərgiz Şeyx-zadə Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində qazanılmış tarixi Qələbənin əhəmiyyəti, Azərbaycan xalqının milli birliyi və həmrəyliyi, şəhidlərimizin qəhrəmanlığı və fədakarlığı, eləcə də Zəfər tarixinin gələcək nəsillərə çatdırılmasının vacibliyindən danışıblar. Həmçinin, xaricdə yaşayan azərbaycanlı gənclərin milli-mənəvi dəyərlərimizin qorunması, Azərbaycan həqiqətlərinin beynəlxalq ictimaiyyətə çatdırılması və ölkəmizin tanıdılması istiqamətindəki rolu vurğulanıb. Daha sonra Zəfər Gününə həsr olunmuş videoçarx nümayiş etdirilib, iştirakçılar arasında mövzu ətrafında fikir mübadiləsi aparılıb.
Macarıstanın Budapeşt şəhərində 8 Noyabr - Zəfər Günü münasibətilə tədbir baş tutub. Tədbirin açılışında çıxış edən Azərbaycanın Macarıstandakı səfiri Esmira Cəfərova Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusunun 44 günlük Vətən müharibəsində qazandığı tarixi Qələbənin əhəmiyyətindən danışıb. Səfir 2020-ci il noyabrın 8-də Şuşa şəhərinin işğaldan azad edilməsinin müharibənin gedişində həlledici dönüş nöqtəsi olduğunu və Azərbaycanın tarixi Zəfərinin rəmzinə çevrildiyini vurğulayıb. Budapeştdə təhsil alan azərbaycanlı gənclərin iştirak etdiyi tədbirin bədii hissəsində tarzən Bəxtiyar Məmmədov və pianoçu İnci Məmmədovanın ifasında musiqi proqramı təqdim olunub. Bundan başqa, Azərbaycanın tarixi Zəfərini, eləcə də işğaldan azad edilmiş ərazilərdə aparılan yenidənqurma işlərini əks etdirən fotosərgi nümayiş olunub.
Ən son xəbərləri səhifəmizdən də izləyin
