https://innews.az/uploads/news/2026-11/_innews_b728e7132cffc2093ca76211f_o.jpg
Sabirabad "Gənclər evi" sosial xidmət müəssisəsinin təşkilatçılığı, “Əminlər” şirkətinin dəstəyi ilə "8 Noyabr – Zəfər Günü"nə həsr olunmuş tədbir keçirilib.
Vətən müharibəsində qazanılmış tarixi Qələbənin mahiyyətinin gənc nəslə çatdırılması, şəhidlərimizin əziz xatirəsinin yad edilməsi və gənclər arasında vətənpərvərlik dəyərlərinin təbliği məqsədi daşıyan tədbirdə müəssisənin direktoru Rəşad Qurbanov, əməkdaşlar və gənclər, şəhid valideynləri, “Əminlər” şirkətinin və “İlğım” markasının rəhbərliyi və əməkdaşları, müharibə veteranları təşkilatlarının nümayəndələri, din xadimləri və ictimaiyyət nümayəndələri iştirak ediblər.
Tədbir Azərbaycan Respublikasının Dövlət Himninin səsləndirilməsi və Vətənimizin azadlığı, suverenliyi və ərazi bütövlüyü uğrunda canlarından keçmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Tədbirin açılışında çıxış edən Sabirabad "Gənclər evi" sosial xidmət müəssisəsinin direktoru Rəşad Qurbanov "8 Noyabr – Zəfər Günü"nün Azərbaycan tarixində müstəsna yerindən, 44 günlük Vətən müharibəsində xalqımızın nümayiş etdirdiyi milli birlik və həmrəylikdən, Azərbaycan Ordusunun misilsiz qəhrəmanlığından bəhs edib.
Rəşad Qurbanov çıxışında qeyd edib ki, Zəfər yalnız hərbi qələbə deyil, həm də xalqımızın iradəsinin, milli ruhunun və Vətən sevgisinin təntənəsidir. O, şəhidlərimizin keçdiyi şərəfli döyüş yolunun, göstərdikləri fədakarlığın və qəhrəmanlığın gələcək nəsillər üçün daim örnək olduğunu vurğulayıb. Direktor gənclərin milli-mənəvi dəyərlərə bağlı, vətənpərvər ruhda yetişdirilməsinin əhəmiyyətinə toxunaraq, bu istiqamətdə maarifləndirici və tərbiyəvi tədbirlərin davamlı təşkilinin vacibliyini diqqətə çatdırıb.
Tədbirdə şəhid valideynləri Etibar Muradov, Xanbala Əsgərov, Minə Hüseynova və Şamama Əsgərova çıxış edərək övladlarının döyüş yolu, Vətənə bağlılığı və qəhrəmanlığı ilə bağlı xatirələrini bölüşüblər. Onların səmimi və duyğulu çıxışları iştirakçılar tərəfindən böyük diqqətlə dinlənilib.
Həmçinin “Əminlər” şirkətinin rəhbəri Məmməd Mənsimov, Vətən Müharibəsi Veteranları Birliyinin Sabirabad rayon şöbəsinin sədri Faiq Hüseynov, Şəhid ailələri, əlilləri və müharibə veteranlarının müdafiəsi ictimai birliyinin Sabirabad rayon şöbəsi sədrinin birinci müavini Telman Qurbanov, din xadimləri Rüfət Utarov və Toğrul Ələkbərov çıxış edərək Vətən müharibəsində qazanılmış tarixi Qələbənin əhəmiyyətindən, xalqımızın sarsılmaz birliyindən və qəhrəmanlarımızın fədakarlığından danışıblar.
Tədbirin bədii hissəsində Sabirabad "Gənclər evi"nin könüllüsü Lamiyə Əhmədova Vətənə və qəhrəmanlarımıza həsr olunmuş şeirlər səsləndirib. İstedadlı gənc Əlili Hüseynin ifasında təqdim olunan vətənpərvərlik ruhunda musiqi nümunələri tədbirə xüsusi ovqat qatıb.
Tədbirin sonunda “Əminlər” şirkətinin rəhbəri Məmməd Mənsimov göstərdiyi təşkilati dəstəyə görə təşəkkürnamə ilə təltif olunub.
Qeyd edək ki, Sabirabad "Gənclər evi" sosial xidmət müəssisəsi tərəfindən gənclərin milli-mənəvi dəyərlər ruhunda formalaşması, vətənpərvərlik hisslərinin gücləndirilməsi, şəhidlərimizin əziz xatirəsinin yaşadılması və tarixi Zəfərimizin təbliği istiqamətində müxtəlif tədbirlər və layihələr həyata keçirilir.
Tədbirin sonunda bir daha vurğulanıb ki, 44 günlük Vətən müharibəsində qazanılmış Zəfər Azərbaycan xalqının tarixində əbədi yaşayacaq, şəhidlərimizin qəhrəmanlığı və Vətənə sədaqəti gələcək nəsillərə daim örnək olacaq.
Ən son xəbərləri səhifəmizdən də izləyin
