https://innews.az/uploads/news/2026-11/_innews_a5b0109c2ac4d6c47f28fa9ac_o.jpg
8 Noyabr Zəfər Günü münasibətilə Mingəçevir Dövlət Dram Teatrının kollektivi Şəhidlər Xiyabanını ziyarət edərək Vətən uğrunda canlarından keçmiş şəhidlərin əziz xatirəsini ehtiramla yad edib.
Daha sonra teatrın kitabxanasında Zəfər Gününə və Ulu Öndər Heydər Əliyevin siyasi irsinə həsr olunmuş kitab sərgisi təşkil edilib.
Ardınca teatrda Zəfər Gününə həsr olunmuş tədbir keçirilib. Tədbirdə şəhid ailələrinin üzvləri, qazilər, şəhər ictimaiyyətinin nümayəndələri və teatr əməkdaşları iştirak ediblər.
Tədbir Azərbaycan xalqının tarixi Zəfərini əks etdirən videoçarxın nümayişi ilə başlayıb. Aparıcı Lalə Abışova iştirakçıları əlamətdar gün münasibətilə təbrik edərək 8 Noyabrın milli qürur, birlik və tarixi ədalətin təntənəsi olduğunu vurğulayıb.
Teatrın rejissoru Aynur Eldəniz çıxışında Zəfər Gününün tarixi və mənəvi əhəmiyyətindən, şəhidlərimizin qəhrəmanlığının gələcək nəsillər üçün örnək olmasından danışıb.
Yerli yazar "Böyük qayıdış" və "Xalqın xidmətçisi" kitablarının müəllifi Emil Xanlarov ədəbiyyatın Zəfər tarixinin və milli yaddaşın qorunmasındakı rolundan bəhs edib.
Tədbirdə çıxış edən qazi Ramil Həsənov Vətən müharibəsinin tarixi əhəmiyyətindən, döyüş yolundan və qazanılan Zəfərin xalqımız üçün daşıdığı mənəvi dəyərdən danışıb. Onun çıxışı iştirakçılar tərəfindən maraqla qarşılanıb.
Proqram müğənni Fuad Nəbiyevin musiqi ifası və "Nur" rəqs qrupunun təqdim etdiyi "Zəfər" rəqsi ilə davam edib.
Teatr əməkdaşlarının hazırladığı videoçarxın nümayişi ilə tədbir yekunlaşıb.
Qeyd edək ki, tədbirin təşkilatçısı Mingəçevir Dövlət Dram Teatrının repertuar və dramaturgiya üzrə mütəxəssisi (ədəbi hissə müdiri) Elçin Məhərrəm olub.
Zəfərimiz əbədi, şəhidlərimizin əziz xatirəsi daim yaşayacaq!.
Ən son xəbərləri səhifəmizdən də izləyin
