https://innews.az/uploads/news/2026-11/_innews_de6a0a3a58ea7ca5720700ab2_o.jpg
Azərbaycan Dövlət Pedaqoji Universitetinin (ADPU) Şamaxı filialında 8 Noyabr – Zəfər Gününün altıncı ildönümü münasibətilə tələbələrin tarixi Qələbə haqqında biliklərinin artırılması, milli-mənəvi dəyərlərə bağlılığının və vətənpərvərlik ruhunun gücləndirilməsi məqsədilə silsilə tədbirlər təşkil olunub.
Zəfər Günü münasibətilə filialda bütün ixtisaslar üzrə ilk dərslər “Zəfər Günü: Tarixi Qələbəmiz, milli qürurumuz” mövzusuna həsr edilib. Dərslərdə 44 günlük Vətən müharibəsinin tarixi əhəmiyyəti, Azərbaycan Ordusunun qəhrəmanlığı, xalqımızın həmrəyliyi və qazanılmış Qələbənin milli yaddaşımızdakı yeri barədə tələbələrə ətraflı məlumat verilib.
Tədbirlər çərçivəsində filialda “Şanlı qələbəmizin və milli qürurumuzun təntənəsi” adlı geniş tədbir də keçirilib. Tədbirdən əvvəl filialın şəhid məzunlarının xatirəsinə ucaldılmış abidə ziyarət olunub, qəhrəmanların əziz xatirəsi ehtiramla yad edilib. Şəhid ailələrinin üzvlərinin və Vətən müharibəsi iştirakçılarının da qatıldığı tədbirdə filialın direktoru, dosent Tünzalə Yusifova, eləcə də professor-müəllim heyətinin nümayəndələri Zəfərin tarixi, siyasi və mənəvi əhəmiyyəti, milli birlik, şəhidlik və qəhrəmanlıq mövzularında çıxış ediblər. Tədbirin bədii hissəsində tələbələr tərəfindən şeir, musiqi və milli rəqs nümunələri təqdim olunub. Sonda şəhid ailələrinin üzvlərinə və müharibə iştirakçılarına təşəkkürnamələr verilib.
Zəfər Günü ərəfəsində filialın Kitabxana və elektron resurslar şöbəsinin müdiri Vəsilə Raziminin və bir qrup fəal tələbənin iştirakı ilə Bakı şəhərinə maarifləndirici ekskursiya təşkil edilib. Ekskursiya zamanı Ulu Öndər Heydər Əliyevin məzarı, Şəhidlər xiyabanı, Zəfər Parkı və Hərbi Qənimətlər Parkı ziyarət olunub. Tələbələr Azərbaycanın dövlətçilik tarixində Ulu Öndər Heydər Əliyevin xidmətləri, şəhidlərimizin qəhrəmanlıq yolu və 44 günlük Vətən müharibəsində Azərbaycan Ordusunun qazandığı tarixi Qələbə haqqında məlumat əldə ediblər.
Bununla yanaşı, Kitabxana və elektron resurslar şöbəsində Zəfər Gününə həsr olunmuş oxucu disputu təşkil edilib və mövzuya uyğun kitab sərgisi-guşə hazırlanıb. Şöbə müdiri Vəsilə Razimi çıxışında Zəfər Gününün tarixi və milli əhəmiyyətindən, xalqımızın nümayiş etdirdiyi birlik və həmrəylikdən, Azərbaycan Ordusunun qəhrəmanlığından bəhs edib. Disput zamanı iştirakçılar tarixi Qələbənin əldə olunmasında milli birliyin, ordumuzun şücaətinin və şəhidlərimizin fədakarlığının rolunu müzakirə edərək fikir və mülahizələrini bölüşüblər. Hazırlanmış guşədə isə Zəfər tariximizi, şəhidlərimizin qəhrəmanlıq salnaməsini və Qələbənin milli yaddaşımızdakı yerini əks etdirən materiallar nümayiş olunub.
Keçirilən silsilə tədbirlər tələbələrin Zəfər tariximiz haqqında biliklərinin dərinləşdirilməsinə, tarixi yaddaşın qorunmasına, şəhidlərimizin əziz xatirəsinin yaşadılmasına və gənc nəslin vətənpərvərlik ruhunda formalaşmasına xidmət edir.
Ən son xəbərləri səhifəmizdən də izləyin
