Camal Qasımov Banqkokda möhtəşəm şouya hazırlaşır

Müğənni Camal Qasımov beynəlxalq musiqi səhnəsində növbəti uğuruna imza atmağa hazırlaşır. Sənətçi ötən gün Tailandın paytaxtı Banqkoka yollanıb.

"innews media"-ın məlumata görə, ifaçını hava limanında “Eurovision Song Contest Asia” müsabiqəsinin təşkilatçıları qarşılayıblar. Daha sonra Camal qaldığı hotelə yollanıb.

Noyabrın 14-də keçiriləcək müsabiqənin rəsmi açılış mərasimində fəxri qonaq qismində səhnə alacaq sənətçi bu dəvəti Qafqazın ən böyük musiqi festivallarından olan “DreamFest”dəki çıxışından sonra əldə edib.

Camal Qasımov komandası ilə birlikdə Banqkokda yerləşən “One Bangkok Forum” kompleksində xüsusi şou təqdim edəcək. O, “Eurovision Song Contest Asia”nın rəsmi açılış proqramına dəvət olunan ilk azərbaycanlı sənətçidir.

Pop ulduz mərasim üçün fərqli konseptdə çıxış və bir sıra sürprizlər hazırlayıb. Onun səhnə performansını taylandlı rəqqaslar müşayiət edəcəklər.

Bundan əlavə, 11 ölkənin nümayəndələri ilə birlikdə qırmızı xalçadan keçəcək Camalın xüsusi obrazı tanınmış dizayner Farizə Mahmudova tərəfindən hazırlanıb. Sənətçinin səhnə çıxışı üçün də modelyer tərəfindən eksklüziv geyim ərsəyə gətirilib.