Şəhidlərimizin övladları üçün Almaniyada keçirilən yay məktəbi davam edir

ASAN Xidmətin və “YAŞAT” Fondunun birgə təşkilatçılığı, “NEQSOL Holding”in və Bakcellin dəstəyi ilə şəhidlərimizin övladları üçün Almaniyanın Frankfurt şəhərində keçirilən yay məktəbi davam edir.

Yohan Volfqan fon Göte adına Frankfurt Universitetində baş tutan proqram çərçivəsində 3 saatlıq ingilis dili dərsləri, Botanika bağında və Meyn çayının sahilində gəzinti gerçəkləşib.

Növbəti gün dərs saatları ilə başlayıb və Römerberq meydanına ziyarətlə davam edib. İştirakçılara meydanın tarixi barədə ətraflı məlumat verilib.

İştirakçılar Qədim Roma imperatorlarının tac qoyma mərasimlərinin keçirildiyi, 16-cı əsrə aid Müqəddəs Varfolomey Kilsəsini ziyarət ediblər.

“YAŞAT" Fondu və "NEQSOL Holding" arasında əməkdaşlığa dair imzalanan niyyət protokolu əsasında icra olunan yay məktəbində 9-cu sinif buraxılış imtahanında ən uğurlu nəticə əldə etmiş 10 nəfər şəhid övladı iştirak edir.

Media dəstəyi: ASAN Radio

“YAŞAT” Fondu tərəfindən şəhidlərimizin övladları üçün mütəmadi olaraq bu cür layihələr reallaşdırılır. Məqsəd onlarının dünyagörüşünün genişləndirilməsinə, yeni biliklər əldə etməsinə xidmət etməklə yanaşı, həm də vaxtlarını səmərəli keçirmələrinə, yeni tanışlıqlar və dostluqlar əldə etmələrinə dəstək olmaqdır.