https://innews.az/uploads/news/2024-01/_innews_2108f74370084923c4018efa1_o.jpg
Fevralın 3-dən Azərbaycan Milli İncəsənət Muzeyində “Muzeydə kino” adlı yeni layihə başlanır. Bildiyiniz kimi, muzeyimiz müxtəlif dövrlərdə yaşayıb-yaratmış Azərbaycan və dünya rəssamlarının əsərlərindən ibarət zəngin kolleksiyaya malikdir. Bu layihə çərçivəsində təqdim edəcəyimiz filmlər sizə sənət insanlarının yaradıcılıq dünyasını daha dərindən dərk etməyə kömək edəcək. Filmlərin nümayişi şənbə və bazar günləri saat 17:00-da muzeyin kinozalında keçiriləcək.
Hörmətli kinosevərlər,
Sizi fevralın 3-ü və 4-də rejissor Şamil Nəcəfzadənin “Üfüqü ötənlər” tammetrajlı bədii-sənədli filminin nümayişinə dəvət edirik. İki hissədən ibarət film beş tanınmış avanqard rəssam – Cavad Mircavadov, Tofiq Cavadov, Əşrəf Murad, Rasim Babayev və Qorxmaz Əfəndiyevdən bəhs edir. 2011-ci ildə “Yaddaş” sənədli filmlər studiyasında istehsal edilmiş filmin ssenari müəllifi Sara Oğuz Nəsirova, operatoru Nizami Abbas, prodüseri Cavid İmamverdiyev, koordinatoru Şirin Məlikovadır.
Qeyd edək ki, “Muzeydə kino” layihəsi hər həftə yenilənəcək proqramla sizlərin görüşünə gələcək. Bizi izləməyə davam edin.
