https://innews.az/uploads/news/2025-04/_innews_ed874d1720bfa513cca69bcf6_o.jpg
Bakıda keçiriləcək "Nine Senses Fest 2025" festivalı ərəfəsində jurnalistlər və tanınmış bloqerlər üçün "Nine Senses" Yaradıcılıq və İncəsənət Mərkəzinə xüsusi mediatur təşkil edilib.
innews.media xəbər verir ki, tədbir zamanı mərkəzin akademik direktoru Natalya Jukova qonaqlara mərkəzin fəaliyyəti barədə geniş təqdimat edib. Onun sözlərinə görə, "Nine Senses" bədən, ruh və sənəti bir araya gətirən unikal konsepsiyaya malikdir:
"Dünyada analoqu olmayan bu mərkəzdə bədənin və ruhun harmoniyası sənət vasitəsilə formalaşdırılır. Biz 'Daxilindəki sənətkarı kəşf et' şüarı ilə fəaliyyət göstəririk. Binamızın arxitekturası sənətin axıcılığını ifadə edən bükülmüş kağız formasını simvolizə edir. Mərkəz üç əsas istiqamətə — ruh, bədən və zehin üzərinə fokuslanır. Burada yoqa dərsləri, incəsənətlə birləşdirilmiş meditasiya seansları keçirilir. Qeyd edim ki, burada hər hansı dini məzmunlu fəaliyyət yoxdur", – deyə Jukova bildirib.
Festival barədə danışan Natalya Jukova qeyd edib ki, "Nine Senses Fest 2025" Heydər Əliyev Fondunun vitse-prezidenti, "Nine Senses Art Center"in qurucusu və Azərbaycan Yoqa Federasiyasının prezidenti Leyla Əliyevanın təşəbbüsü və dəstəyi ilə keçiriləcək.
Mayın 2-dən 4-dək davam edəcək festivalda iştirakçılar yoqa və meditasiya təcrübələri, şərq və slavyan təbabəti, sufi fəlsəfəsi, art-terapiya, səs performansları, konsertlər, "ecstatic dance", neyroqrafika və qadın balans praktikaları kimi bir çox fərqli sahələrlə tanış ola biləcəklər.
Festival "Ənənədən hərəkətə doğru" şüarı altında insanın mənəvi və fiziki inkişafını dəstəkləməyi, qədim biliklərlə müasir yanaşmalar arasında körpü qurmağı qarşısına məqsəd qoyub. Eyni zamanda tədbir müəllimlər arasında təcrübə mübadiləsini və fərqli mədəni biliklərin paylaşımını təşviq edəcək.
Festival çərçivəsində Azərbaycan Tekstil Assosiasiyasının dəstəyi ilə "Made in Azerbaijan" brendi altında məhsulların təqdim olunacağı geniş yarmarka da keçiriləcək. Shoppingaz.az platformasının təşkil etdiyi yarmarkada 200-dən çox yerli brend məhsullarını nümayiş etdirəcək və iştirakçılarla birbaşa ünsiyyət qurmaq imkanı əldə edəcəklər.
Yerli istehsalçılar yarmarkada iştirak etmək üçün aşağıdakı əlaqə vasitələri ilə müraciət edə bilərlər:
E-poçt: office@shoppingaz.az
Telefon: (+994 10) 252-46-00
Festival biletləri artıq satışdadır. Biletləri əldə etmək və tədbir proqramı ilə tanış olmaq üçün rəsmi sayt ziyarət edilə bilər.
