Röya: “Əziyyətim yerə vurulmasın, icazə verin bu yaşa dolmuş Röya həyatını yaşasın”

Dizayner Aynur Xəlilovanın yutubda yayımlanan “Hərşeyşünas” podkastının mövsüm finalı Xalq artisti Röyanın iştirakı ilə baş tutub.

innews.media xəbər verir ki, söhbət zamanı sənətçi son günlər Kann Film Festivalında iştirakı ilə bağlı yaranan müzakirələrə münasibət bildirib. Röya məsələyə belə aydınlıq gətirib:

“Əslində çox təəssüf edirəm ki, belə bir şey yaşanıb. Mən pis bir şey etməmişəm. Kann festivalında iştirak edən nə birinci, nə də sonuncu müğənniyəm. Ora dünyanın hər yerindən ulduzlar axışır. Mənim orda olduğum günlərdə türk müğənnisi Ebru Yaşar da orda idi. Təəssüf edirəm ki, mənim ora getməyimi düzgün anlaya bilmədilər. Mən arzularımı reallaşdırdım, oranı görmək istəyirdim. Bəlkə yeni arzularımın başlanğıcı oradır. Niyə buna imkan vermirsiniz?”

Müğənni bu səfərindən sonra insanların onun “ikinci Röya”sını gördüyünü də bildirib:

“Heç istəməzdim belə bir şey yaşansın, amma yaşandı. Həyatda peşman olmağı sevmirəm, ona görə də peşman deyiləm. Sadəcə olaraq rica edirəm ki, mənim əziyyətim yerə vurulmasın. İcazə verin, bu yaşa çatmış Röya həyatını yaşasın. Niyə elə edirsiniz ki, mən sizə 15-16 yaşlı Röya kimi cavab verim?”