https://innews.az/uploads/news/2025-06/_innews_60bb0426254e40ac4778c9e35_o.jpg
Bakıda səfərdə olan Türkiyə Gənclər Fondunun (TÜGVA) sədri İbrahim Beşinci Azərbaycan Gənclər Fondu ilə birgə layihənin yaxın günlərdə ictimaiyyətə təqdim ediləcəyini bildirib.
innews.media xəbər verir ki, TÜGVA rəhbəri bu barədə media nümayəndələri ilə görüşdə çıxış edib.
“Fondumuz 11 ildir fəaliyyət göstərir. Əsas məqsədimiz yeniyetmələrə düşərgə imkanları, gənclərə isə təqaüdlərlə dəstək verməkdir. Artıq fəaliyyətimizi yalnız Türkiyə ilə məhdudlaşdırmaq niyyətində deyilik. Azərbaycan başda olmaqla, digər ölkələrdə də fəal iştirak etməyi planlaşdırırıq”, – deyə İbrahim Beşinci vurğulayıb.
Onun sözlərinə görə, Azərbaycan Gənclər Fondu ilə keçirilən görüş zamanı təhsil, könüllülük, startap və innovasiya sahələri üzrə əməkdaşlıq imkanları ətrafında fikir mübadiləsi aparılıb.
“Ortaq proqramla bağlı rəsmi açıqlama tezliklə veriləcək. Müraciətlər həm Türkiyə, həm də Azərbaycandan qəbul olunacaq. İyul ayının ortalarında başlanması planlaşdırılan layihənin ilk mərhələsində Azərbaycandan 50-yə yaxın yeniyetmənin iştirakı nəzərdə tutulur”, – o qeyd edib.
TÜGVA sədrinin sözlərinə görə, layihənin ilk mərhələsi düşərgə formatında keçiriləcək:
“Bu mərhələni yalnız başlanğıc kimi görürük. Gələcəkdə təhsil sahəsində də birgə fəaliyyət göstərməyi, tələbələr üçün təqaüdlər və yataqxana dəstəyi göstərməyi hədəfləyirik. Bu cür təşəbbüslər iki qardaş ölkənin gəncləri arasında bağları daha da möhkəmləndirəcək və yeni əməkdaşlıq imkanları yaradacaq”.
İbrahim Beşinci həmçinin Azərbaycan xalqına və dövlətinə xüsusi təşəkkürünü bildirib:
“Azərbaycan hər zaman Türkiyənin yanında olub. Bu gün Kahramanmaraşda Azərbaycan tərəfindən inşa edilən yeni bir yaşayış məhəlləsinin açılışı olacaq. Sözügedən layihə yüksək estetik və funksional keyfiyyətlərlə, Azərbaycan memarlığına uyğun şəkildə reallaşdırılıb”.
Layihə ilə bağlı məlumatların həm TÜGVA-nın, həm də Azərbaycan Gənclər Fondunun rəsmi sosial media hesablarında paylaşılacağı bildirilib.
