Sözün sehrinə səfər- Bəxtiyar Vahabzadənin işığında

Sözün sehrinə səfər- Bəxtiyar Vahabzadənin işığında Sözün sehrinə səfər- Bəxtiyar Vahabzadənin işığında https://innews.az/az/news/id-51784

Azərbaycan Yazıçılar Birliyi və Azərbaycan İncəsənət Məktəbinin təşkilatçılığı ilə Xalq şairi Bəxtiyar Vahabzadənin 100 illik yubileyinə həsr olunmuş “Ana dili” qiraət müsabiqəsində iştirak etmək mənim üçün böyük bir qürur və unudulmaz təcrübə oldu. Bu tədbir təkcə bir qiraət yarışması deyildi, həm də milli kimliyimizin, dilimizin saflığının, sözümüzün gücünün və poeziyamızın əzəmətinin bir daha nümayişi idi.

Səhnəyə çıxıb Xalq şairinin “İllər” şeirini səsləndirərkən, zamanın axarını, həyatın dərin fəlsəfəsini və şairin qəlbindən süzülən söz sehrini duymaq mənim yaddaşımda ən dəyərli anlardan biri kimi qalacaq. Poeziya insanı təkcə düşündürmür, həm də ruhunu saflaşdırır, mənəvi zənginliyini artırır. Mən də həmin anlarda yalnız şeiri səsləndirmirdim, eyni zamanda Vahabzadənin ruhu ilə danışır, onun illər öncə yazdığı misraların bu gün də necə aktual olduğunu hiss edirdim.

Qiraətimin sonunda təqdim edilən sertifikat isə bu dəyərli anları mənim üçün əbədi xatirəyə çevirdi. Bu sadəcə bir kağız deyil, mənim yaddaşıma yazılmış bir qürur nişanıdır.

Ən səmimi təşəkkürümü Azərbaycan Yazıçılar Birliyinin sədri, Xalq yazıçısı Anar bəyə, Azərbaycan İncəsənət Məktəbinin direktoru Tural Əliyevə və bütün əziyyəti keçən təşkilatçılara bildirirəm. Onların zəhməti sayəsində biz gənclər dilimizin və ədəbiyyatımızın möhtəşəmliyini daha yaxından hiss etmək imkanı qazandıq.

Bütün iştirakçı dostlarıma da uğurlar diləyir, hər birinin səhnədəki çıxışını alqışlayıram. Arzum budur ki, gələcəkdə belə tədbirlər daha çox keçirilsin, çünki bu, gənclərin milli dəyərlərə bağlılığını gücləndirir, bizi köklərimizə, tariximizə və poeziyamıza bir addım da yaxınlaşdırır.

Unutmayaq ki, dilimizi yaşatmaq onu qorumaqla başlayır, ədəbiyyatımızı yaşatmaq isə onu oxumaq, sevmək və gələcək nəsillərə ötürməklə mümkündür.

Bəxtiyar Vahabzadənin “İllər” şeirində dediyi kimi:

Deyin, hara belə tələsirsiniz?

Sizsiniz ömrümün yelkəni, illər!

Mən sizi qovardım uşaqlığımda,

İndi qovursunuz siz məni, illər!..

Bu misralar illərin necə sürətlə keçdiyini göstərir və bizə bir daha hər anın qədrini bilməyi öyrədir.

Türkanə Meşədiyeva

Bakı Dövlət Universiteti Jurnalistika fakültəsinin 3-cü kurs tələbəsi