https://innews.az/uploads/news/2025-10/_innews_38f2e46dd454682ddc60f1862_o.jpg
Oktyabrın 21-də Azərbaycan Dövlət Pedaqoji Universitetinin (ADPU) Təhsilin təşkili və idarə edilməsi (MBA) ixtisaslaşmasının II tədris ili magistrantları təhsil müəssisələrində idarəetmə fəaliyyəti ilə tanışlıq məqsədilə ADPU nəzdində Azərbaycan Dövlət Pedaqoji Kollecində (ADPK) olublar.
Kollecin direktoru Amalya Sezgin kollecin fəaliyyəti, məqsədləri və strateji inkişaf planları haqqında ətraflı məlumat verib. O, kollecin təhsil və tərbiyə sahəsindəki uğurlarını qeyd edərək, əməkdaşlıq və təcrübə mübadiləsinin əhəmiyyətini vurğulayıb. Amalya Sezgin kollecdə həyata keçirilən layihələr və yenilikçi təşəbbüslər barədə də məlumat verib.
ADPU-nun elm və innovasiyalar üzrə prorektoru professor Asəf Zamanov tədbirin təşkilinə görə kollecin rəhbərliyinə təşəkkür edib. Təhsildə strateji idarəetmənin əhəmiyyətini vurğulayaraq, idarəetmənin elmi əsaslara söykənməli olduğunun vacibliyini qeyd edib. Prof. A.Zamanov çıxışında innovativ yanaşma, strateji planlaşdırma, operativ və düzgün qərarvermənin üstünlüklərindən söz açıb.
Kollecin tərbiyə işləri üzrə direktor müavini Nigar Şirəliyeva tələbələrdə mənəvi dəyərlərin formalaşdırılması və sistemli təşkili barədə danışıb.
Sosial məsələlər və ictimaiyyətlə əlaqələr üzrə direktor müavini Sevda Axundova sosial layihələr və ictimai əlaqələrin təhsil prosesinə müsbət təsirindən bəhs edib.
Tədris şöbəsinin müdiri Xanımqız Rüstəmova tədris prosesinin idarə edilməsi və fənlər üzrə tədris proqramlarının keyfiyyətli icrası barədə məlumat verib.
Sosial iş şöbəsinin müdiri Sevinc Ələkbərova tələbələrin sosial rifahı və onlara psixoloji dəstək istiqamətində həyata keçirilən tədbirlər, Keyfiyyət təminatı şöbəsinin müdiri Elmira Budaqova təhsildə keyfiyyətin qiymətləndirilməsi və daxili monitorinq mexanizmləri haqqında danışıblar.
Görüş interaktiv şəraitdə davam edib. Strateji idarəetmə barədə magistrantların sualları cavabandırılaraq müzakirələr aparılıb.
