https://innews.az/uploads/news/2025-10/_innews_80d00d9602b2e5f8eac675581_o.jpg
Oktyabrın 27-də Azərbaycan Dövlət Pedaqoji Universiteti (ADPU) və Səbail Rayon İcra Hakimiyyəti birgə təşkilatçılığı ilə “Vətən müharibəsi Qəhrəmanları ilə bir gün” mövzusunda görüş keçirilib.
Tədbirdə universitet rəhbərliyi, tələbələr, şəhid ailələrinin üzvləri, qazilər və ictimaiyyət nümayəndələri iştirak ediblər. Görüşün əsas məqsədi gənc nəslin vətənpərvərlik ruhunda tərbiyəsi, qəhrəmanların şücaətinin təbliği və onların xatirəsinin yaşadılması olub.
Görüşü giriş sözü ilə ADPU-nun sosial və humanitar məsələlər üzrə prorektoru professor Fikrət Rzayev açaraq, Vətən müharibəsinin Azərbaycanın müasir tarixində qürurverici bir səhifə olduğunu qeyd edib və bu qəhrəmanlıq salnaməsinin gənclər üçün örnək təşkil etdiyini vurğulayıb. F.Rzayev bildirib ki, ADPU rəhbərliyi və kollektivi hər zaman şəhid ailələrinə və qazilərə dərin hörmət və diqqətlə yanaşır, bu mövzuda universitetdə ardıcıl maarifləndirici və vətənpərvərlik yönümlü tədbirlər həyata keçirilir.
Səbail Rayon İcra Hakimiyyəti başçısının müavini Kəmalə Həşimova çıxışında ölkəmizdə şəhid ailələrinə və qazilərə göstərilən qayğının dövlət siyasətinin prioritet istiqamətlərindən biri olduğunu diqqətə çatdırıb.
Daha sonra şəhid kapitan Mühüd Orucovun həyat yoldaşı, eyni zamanda, ADPU-nun Kitabxana-İnformasiya Mərkəzinin Elektron resurslar və elektron kataloqun təşkili şöbəsinin kitabxanaçısı Qumru Orucova və Vətən müharibəsi qazisi Polad Rzayev çıxış edərək müharibə illərində yaşadıqları xatirələri bölüşüb və gənclərə Vətənə sədaqət, birlik və mübarizə əzmi aşılayan fikirlər səsləndiriblər.
Sonda tələbələrə şəhid Mühüd Orucovun həyat yolunu özündə əks etdirən xatirə kitabı təqdim olunub.
