https://innews.az/uploads/news/2025-11/_innews_0800de84d895bf9e6eaea73f8_o.jpg
Noyabrın 5-də Azərbaycan Dövlət Pedaqoji Universitetində (ADPU) Çin Xalq Respublikasının Tianshui Normal Universitetinin (TNU) nümayəndə heyəti ilə görüş keçirilib.
Görüşdə ADPU-nun rektoru professor Cəfər Cəfərov, elm və innovasiyalar üzrə prorektor professor Asəf Zamanov, tədris işləri üzrə prorektor dosent Eldar Aslanov, beynəlxalq əlaqələr şöbəsinin müdiri Günay Məhərrəmova, Beynəlxalq əlaqələr şöbəsinin baş mütəxəssisi Gülnar Ələkbərova, Tianshui Normal Universitetinin rektoru Vang Juying, Akademik İşlər Ofisinin direktoru Yang Xueliang, Ədəbiyyat və Mədəniyyətlərarası Kommunikasiya Fakültəsinin dekanı Yu Liangcai, Elmi Tədqiqatların İdarə olunması Ofisinin müdir müavini, Təhsil Nazirliyi nəzdində Ölkə və Regional Tədqiqatlar Mərkəzinin direktoru, “Qafqaz Tədqiqatları Mərkəzi”nin rəhbəri Jia Yingliang, həmçinin Əməkdaşlıq və Mübadilə Ofisinin sektor müdiri Zhang Na iştirak ediblər.
ADPU-nun rektoru prof. Cəfər Cəfərov qonaqları salamlayaraq, universitetin beynəlxalq əlaqələrinin inkişaf istiqamətləri, həyata keçirilən layihələr və gələcək əməkdaşlıq imkanları barədə məlumat verib. Rektor bildirib ki, Çin ali təhsil müəssisələri ilə qurulan münasibətlər pedaqoji təhsil sahəsində elmi və mədəni əməkdaşlığın yeni mərhələsinə təkan verəcək.
TNU-nun rektoru Vang Juying rəhbərlik etdiyi universitetin fəaliyyəti, elmi-tədqiqat sahəsində prioritet istiqamətləri barədə məlumat verib. O, ADPU ilə tərəfdaşlığın elmi-tədris və mədəni əlaqələrin inkişafına töhfə verəcəyinə əminliyini ifadə edib.
Görüşün yekununda Azərbaycan Dövlət Pedaqoji Universiteti və Tianshui Normal Universiteti arasında akademik əməkdaşlığa dair Anlaşma Memorandumu imzalanıb. Memorandum birgə elmi fəaliyyətin təşkili, tələbə və müəllim mübadiləsi, ikili diplom proqramlarının həyata keçirilməsi, eləcə də akademik proqramların birgə hazırlanması kimi istiqamətləri əhatə edir.
Səfər çərçivəsində nümayəndə heyəti ADPU-nun tədris binasının infrasturukuru, Türkoloji Mərkəz, TÜRKSOY kafedrası, Filologiya fakültəsi və tələbə auditoriyaları ilə tanış olub. Qonaqlara universitetin tədris mühiti, beynəlxalq proqramları və tələbələr üçün yaradılan imkanlar barədə ətraflı məlumat verilib.
