https://innews.az/uploads/news/2025-12/_innews_50fa6c8501cd16ee521b4ea7a_o.jpg
Azərbaycan Dövlət Pedaqoji Universitetinin Magistratura və doktorantura şöbəsində Fəlsəfə və sosial elmlər və Xüsusi təhsil kafedraları ilə birgə təşkil edilmiş 3 Dekabr – Beynəlxalq Əlillər Gününə həsr olunmuş tədbir keçirilib.
Tədbiri giriş sözü ilə açan Magistratura və doktorantura şöbəsinin müdiri, siyasi elmlər üzrə fəlsəfə doktoru Rəşad Sadıqov 3 Dekabr – Beynəlxalq Əlillər Gününün təsis edilməsinin əhəmiyyətindən danışıb. Bildirilib ki, 1994-cü ildə Ümummilli Lider Heydər Əliyevin müvafiq sərəncamı ilə Azərbaycanda da 3 Dekabr - Beynəlxalq Əlillər günü geniş qeyd edilir. R.Sadıqov ölkəmizdə bütün əlilliyi olan şəxslərə, o cümlədən dövlətimizin suverenliyi, ərazi bütövlüyü uğrunda mübarizə apararkən əlil olmuş qazilərimizə, əlilliyi olan idmançılara Azərbaycan Respublikasının Prezidenti, Müzəffər Ali Baş Komandan cənab İlham Əliyevin və Azərbaycanın birinci vitse-prezidenti, Heydər Əliyev Fondunun Prezidenti Mehriban xanım Əliyevanın böyük diqqət və qayğısından söz açıb.
Xüsusi təhsil kafedrasının baş müəllimi Zeynəb Məmmədova “Əlillik məhdudiyyət yox, fərqlilikdir” mövzusunda məruzəsi dinlənilib. Məruzədə Beynəlxalq Əlillər Gününün təsis edilməsində əsas məqsədin ictimai həyatın bütün sahələrində əlillərin hüquqlarının qorunmasına nail olmaqdan və ictimaiyyətin diqqətini onların problemlərinə yönəltməkdən ibarət olduğu diqqətə çatdırılıb. Vurğulanıb ki, əlilliyi olan şəxslərin hüquqlarının genişləndirilməsi məhz inklüzivliyin və bərabərliyin təmin olunmasına zəmin yaradır.
Sonra Magistratura və doktorantura şöbəsinin I tədris ilində təhsil alan Gənclərlə iş ixtisaslaşması üzrə magistrantı, gözdən əlilliyi olan Xəyalə Abdullayeva “Doğru bilinən yanlışlar”, Xüsusi təhsil ixtisaslaşması üzrə magistrantı Rəvanə Xankişiyeva “Biz fərqliyik, amma bərabərik”, Həyat fəaliyyətinin müxtəlif sahələrində sosial iş ixtisaslaşmasının magistrantı Sonara İsmayılova “Əlillik məfhumu və onun insanlara təsiri” mövzularında çıxış ediblər. Bildirilib ki, bu günün xüsusi qeyd edilməsi cəmiyyətin yalnız fiziki və psixi baxımından sağlam insanlardan ibarət olmadığını, əlilliyi olan şəxslərə xoş münasibət göstərilməsinin, onlara uyğun infrastruktur imkanlarının yaradılmasının daim diqqət mərkəzində saxlanılmasının vacibliyini hər birimizə bir daha xatırladır. Belə ki, cəmiyyət fərqli insanlar toplusu olduğuna görə onların arasında fiziki, psixoloji və ya intellektual çətinliklərlə yaşayanlar da var. Lakin, bu fərqliliklər onları cəmiyyətin kənarında yox, cəmiyyətin mərkəzində görməyi tələb edir.
Tədbirdə 3 Dekabr – Beynəlxalq Əlillər Gününün təsis edilməsinin əhəmiyyəti, əlilliyi olan şəxslərə dövlət qayğısı, qanunvericilik islahatları, həmin şəxslər üçün yaradılan sosial-iqtisadi, infrastruktur imkanlarından bəhs edən videoçarx nümayiş etdirilib.
