https://innews.az/uploads/news/2025-12/_innews_7952a74483143fc7dcc4c31f9_o.jpg
Azərbaycan Dövlət Pedaqoji Universitetində (ADPU) "Təhsilin yeni paradiqması" layihəsi çərçivəsində ADPU-nun Tədris departamentinin Məzun Koordinasiya və Karyera şöbəsinin təşkilatçılığı və Dövlət Məşğulluq Agentliyinin Mərkəzi Karyera filialının təşəbbüsü ilə Filologiya fakültəsinin tələbələri ilə görüş keçirilib.
Konfransda açılış nitqi ilə çıxış edən Məzun Koordinasiya və Karyera şöbəsinin müdiri Könül Əsgərova tələbələri və qonaqları salamlayıb, konfransın mövzusu və proqramı barədə iştirakçılara məlumat verib.
Konfransın məruzəçiləri Elm və Təhsil üzrə Dövlət Agentliyinin Ali təhsil müəssisələri ilə iş sektorunun müdüri və SABAH qrupları İcra Komitəsinin rəhbəri Elza Səmədli, Dövlət Məşğulluq Agentliyinin Təhlil və strateji planlaşdırma departamentinin müdir müavini Bəhman Hüseynli təhsil sistemində qlobal dəyişikliklər, innovativ yanaşmaların tətbiqi, rəqəmsal bacarıqların inkişafı, eləcə də əmək bazarının tələblərinə uyğun kompetensiyaların formalaşdırılması istiqamətləri barədə məruzələrlə çıxış ediblər. Spikerlər tərəfindən şəxsiyyətə yönəlmiş təhsil modelinin rolu, fərdiləşdirilmiş öyrənmə mühitlərinin yaradılması, müəllim hazırlığında yeni standartların tətbiqi, həmçinin təhsil texnologiyalarının daxil edilməsi məsələləri geniş şərh edilib.
Sonda tələbələri maraqlandıran suallar cavablandırılıb.
