https://innews.az/uploads/news/2025-12/_innews_33b407926319b4139058e5318_o.jpg
Dekabrın 17-də Azərbaycan Yazıçılar Birliyinin “Natəvan” klubunda ADMİU-nun dosenti, pedaqogika üzrə fəlsəfə doktoru, Azərbaycan Yazıçılar Birliyinin və Türkiyənin İLESAM – Elm və Ədəbiyyat Əsəri Sahibləri Məslək Birliyinin üzvü Sevinc Həsənovanın “Unudulmayan izlər” adlı kitabının təqdimat mərasimi keçirilib.
Tədbiri respublikanın Əməkdar artisti, ADMİU-nun kafedra müdiri, professor Azad Şükürov aparıb. Təqdimat mərasimi Vətənimizin azadlığı və ərazi bütövlüyü uğrunda canlarını fəda etmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Müəllif Sevinc Həsənova çıxış edərək kitabın ərsəyə gəlmə məqsədindən, onun ideya-məzmun istiqamətlərindən və nəşrin mənəvi yükündən danışıb.
Kitabın redaktoru, şair, jurnalist, kinorejissor, Azərbaycan Yazıçılar Birliyinin Mətbuat Xidmətinin rəhbəri Xəyal Rza AYBKitab layihəsi çərçivəsində işıq üzü görən “Unudulmayan izlər” toplusunun elmi və publisistik əhəmiyyətini vurğulayaraq, nəşrin müasir ədəbi prosesin araşdırılması baxımından mühüm mənbə olduğunu bildirib.
Tədbirdə filologiya elmləri doktoru, professor, AMEA Nəsimi adına Dilçilik İnstitutunun şöbə müdiri Mayıl Əsgərov, ADMİU-nun Ədəbiyyat və dillər kafedrasının müdiri, filologiya elmləri doktoru, professor Fəridə Səfiyeva, Azərbaycan Dövlət Pedaqoji Universitetinin professoru, pedaqoji elmlər doktoru Nabat Cəfərova, Bakı Dövlət Universitetinin dosenti, filologiya üzrə fəlsəfə doktoru Kəmalə İslamzadə, AMEA Nizami adına Ədəbiyyat İnstitutunun aparıcı elmi işçisi, filologiya üzrə fəlsəfə doktoru, dosent Qürbət Mirzəzadə, AMEA Nəsimi adına Dilçilik İnstitutunun aparıcı elmi işçisi, filologiya üzrə fəlsəfə doktoru, dosent Şəlalə Ana Hümmətli, ADMİU-nun dosentləri, sənətşünaslıq üzrə fəlsəfə doktoru Elfira Məlikova, pedaqogika üzrə fəlsəfə doktoru, Əminə Qədimova, Bakı şəhəri 30 saylı məktəbin direktoru Mehriban Poladova, gənc yazıçı, AYB-nin üzvü Səma Muğanna kitab haqqında dəyərli fikirlər səsləndirdilər.
Qeyd olunub ki, “Elm və təhsil” nəşriyyatında işıq üzü görən (Bakı, 2025) “Unudulmayan izlər” ədəbi-tənqidi məqalələr toplusu görkəmli metodist-alim, pedaqoji elmlər doktoru, professor Məhəmməd Həsənovun anadan olmasının 95 illiyinə ithaf olunub. Topluda “Kitabi-Dədə Qorqud” eposundan başlayaraq klassik və çağdaş ədəbiyyat nümunələrinə, ana dili, azərbaycançılıq, Qarabağ və Qərbi Azərbaycan mövzularına qədər geniş bir elmi-ədəbi panorama təqdim edilir.
Təqdimat mərasimi çərçivəsində ADMİU-nun Teatr sənəti fakültəsinin tələbələrinin ifasında bədii kompozisiya nümayiş etdirilib. Kompozisiyada Həsən Cəfərov, Arzum Əlirzayeva, Əli Zeynallı, Ayan Məmmədova, Sunqulu Kərimov və Asude Yılmaz iştirak ediblər.
Tədbirin sonunda Sevinc Həsənova yekun çıxışı edərək qonaqlara təşəkkürünü bildirib. Ardınca AYB-nin “Natəvan” klubunda müəllif oxucular üçün “Unudulmayan izlər” kitabını imzalayıb, iştirakçılarla xatirə şəkilləri çəkdirib.
