https://innews.az/uploads/news/2025-12/_innews_81dce3980b4ee8bf8d45d1eb7_o.jpg
Azərbaycan Dövlət Pedaqoji Universitetinin (ADPU) fakültə, filial və sturukturlarında Ümumilli Lider Heydər Əliyevin anım günü geniş tədbirlərlə qeyd edilib.
Magistratura və doktorantura şöbəsində təşkil edilən tədbirdə açılış nitqi ilə çıxış edən şöbə müdiri, siyasi elmlər üzrə fəlsəfə doktoru Rəşad Sadıqov qeyd edib ki, doğma xalqının yüksək inkişafı və dövlətçilik ənənələrinin möhkəmləndirilməsi uğrunda fəaliyyət göstərmiş Ümummilli Lider Heydər Əliyev həm sovet hakimiyyəti dövründə (1969–1982), həm də müstəqillik illərində (1993–2003) mürəkkəb tarixi şəraitə baxmayaraq, ölkəmizin bütün sahələr üzrə davamlı inkişafını təmin edən genişmiqyaslı islahatlar həyata keçirib. Rəşad Sadıqov vurğulayıb ki, Ulu Öndərin müəyyənləşdirdiyi strateji inkişaf xətti, sosial-iqtisadi, hərbi-strateji, daxili və xarici siyasətə dair konsepsiyaları bu gün Azərbaycan Respublikasının Prezidenti, Müzəffər Ali Baş Komandan cənab İlham Əliyev tərəfindən ardıcıl və uğurla davam etdirilir. Məhz həmin ideyalar və konseptual yanaşmalar müasir Azərbaycanın əldə etdiyi mühüm nailiyyətlərin, o cümlədən öz torpaqlarını azad etmiş qüdrətli dövlət kimi dünya tarixində mövqeyini möhkəmləndirməsinin əsasını təşkil edir. R.Sadıqov bildirib ki, Ümummilli Lider Heydər Əliyevin əziz xatirəsi Azərbaycan xalqının qəlbində daim ehtiramla anılacaq və gələcək nəsillərə örnək olaraq yaşayacaqdır.
Ümumi tarix və tarixin tədrisi texnologiyası kafedrasının professoru Mübariz Əmirov “XXI əsrin fenomen şəxsiyyəti” mövzusunda məruzəsində Ümummilli Lider Heydər Əliyevin həyat və fəaliyyətindən, nümunəvi şəxsiyyət kimi inkişafından, Azərbaycan xalqı üçün gördüyü əvəzolunmaz tarixi işlərin əhəmiyyətindən danışıb.
Sonra şöbənin I tədris ili magistrantı Ayşən Qədirli “Heydər Əliyev – dilimizin xilaskarı”, II tədris ili magistrantları – Sevinc Həsənova “Heydər Əliyevin Azərbaycana rəhbərliyi dövründə ali təhsil sahəsindəki nailiyyətlər”, Təhmasib İmaməliyev “Heydər Əliyev və gənclər siyasəti ”, Lamiyə İsrafilli “AMEA-nın inkişafında Heydər Əliyevin rolu” mövzusunda təqdimatla çıxış ediblər.
Məktəbəqədər Təhsil Fakültəsinin Tələbə Həmkarlar İttifaqları Komitəsinin təşəbbüsü ilə Ümummilli Lider Heydər Əliyevin anım gününə həsr olunmuş tədbir keçirilib. Tədbiri fakültə dekanı dosent Nailə Hüseynova açıq elan edərək, Ulu Öndər Heydər Əliyevin Azərbaycan dövlətçiliyinin formalaşması, təhsilin inkişafı və gənclərin hərtərəfli yetişdirilməsi istiqamətində tarixi xidmətlərdən söz açıb. N.Hüseynova bildirib ki, Heydər Əliyevin müəyyən etdiyi inkişaf strategiyası bu gün ölkəmizin bütün sahələrində olduğu kimi, təhsil sektorunda da əsas istiqamətverici xətt olaraq qalır.
Tədbir zamanı tələbələr Ulu Öndərin zəngin həyat yolu və dövlətçilik fəaliyyəti haqqında geniş təqdimat ediblər. Çıxışlarda Ulu Öndərin Azərbaycanın müasir inkişafında oynadığı misilsiz rol, həmçinin, Heydər Əliyevin vətənpərvərliyi, xalqına olan bağlılığı və Azərbaycan tarixində iz qoymuş siyasi irs barədə söz açılıb. Tədbir tələbələrin ifasında şeir və çıxışlarla davam edib.
Ulu Öndərin anım günü ilə əlaqədar Şəki filialında silsilə tədbirlər keçirilib. Filial əməkdaşlarının və tələbələrinin Şəki Heydər Əliyev Mərkəzinə ekskursiyaları təşkil olunub. Ekskursiyada Ulu Öndər Heydər Əliyevin həyat və fəaliyyəti, Vətən və xalq qarşısındakı əvəzsiz xidmətlərindən geniş bəhs edilib.
Dekabrın 12-də filialın kollektivi Ulu Öndərin Şəki şəhərindəki Heydər Əliyev Mərkəzinin qarşısındakı abidəsini ziyarət edib, abidə önünə gül dəstələri düzərək, xatirəsini böyük hörmət və ehtiramla yad ediblər.
