https://innews.az/uploads/news/2025-12/_innews_d0d4bf17579b486562b7e704b_o.jpg
Azərbaycan Dövlət Pedaqoji Universitetinin (ADPU) Heydər Əliyev məktəbinin lektoriyasında Azərbaycan tarixi kafedrasının dosenti, universitetin elmi katibi kimi də çalışmış mərhum İradə Qasımovanın anadan olmasının 65 illiyi münasibətilə elmi seminar keçirilib.
Seminarın moderatoru dosent Afaq Piriyeva bildirib ki, İradə Qasımova uzun illər ADPU-da vicdanla çalışıb, öz biliyi, məsuliyyəti və səmimiyyəti ilə həm tələbələrin, həm də həmkarlarının dərin hörmətini qazanıb.
ADPU-nun rektoru professor Cəfər Cəfərova çıxışında İradə Qasımova ilə bağlı xatirələrini bölüşüb, onun uzun illər ADPU-da səmərəli fəaliyyət göstərdiyini, elmi katib kimi məsuliyyətli və nümunəvi işi ilə seçildiyini qeyd edib. Mərhumun tələbələrin sevimli müəllimi olduğunu, universitet kollektivində dərin hörmət və nüfuz qazandığını xüsusi vurğulayıb. Rektor qeyd edib ki, yubiley elmi seminarı mərhum müəllimin zəngin elmi-pedaqoji irsinin, insan kimi yüksək keyfiyyətlərinin xatırlanması və gənc nəslə çatdırılması baxımından mühüm əhəmiyyət daşıyır.
Tarix və coğrafiya fakültəsinin dekanı dosent Asif Axundov çıxış edərək İradə Qasımovanın elmi fəaliyyəti, Azərbaycan tarix elminin inkişafına verdiyi töhfələr və universitetin elmi həyatındakı xidmətləri haqqında ətraflı məlumat verib.
Seminarda çıxış edən dosent Naibə Əhmədova, dosent Vaqif Əliyev, dosent Dəyanət Musayev, tarix üzrə fəlsəfə doktoru Raminə Hüseynli və digər natiqlər mərhum alimin zəngin həyat yolu, çoxillik elmi-pedaqoji fəaliyyəti, təşkilatçılıq bacarığı, insanpərvərliyi və tələbələrə olan qayğıkeş münasibəti ilə yadda qaldığını qeyd ediblər.
Elmi seminar mərhum İradə Qasımovanın həyat və fəaliyyətinə həsr olunmuş video-çarxın nümayişi və tələbələrin ifasında bədii hissə başa çatıb.
