https://innews.az/uploads/news/2025-12/_innews_5f5d990e5079cd1c1e3dde4c0_o.jpg
Azərbaycan Dövlət Pedaqoji Universitetinin (ADPU) Kimya və biologiya fakültəsi ilə Yusif Məmmədəliyev adına Neft-Kimya Prosesləri İnstitutu arasında imzalanmış əməkdaşlıq memorandumunun fəaliyyət planına uyğun olaraq, Kimya və biologiya faküləsinin tələbələri fakültənin dekan müavini dosent Bəsti Əsədovanın rəhbərliyi ilə sözügedən institutda olublar. Tələbələr İnstitutun baş direktoru akademik Vaqif Abbasovla görüşüb, institutun yaranma tarixi, əsas elmi istiqamətləri və fəaliyyəti barədə ətraflı məlumat əldə ediblər.Qeyd edilib ki, İnstitutun formalaşmasında və elmi ənənələrinin bünövrəsinin qoyulmasında görkəmli alim, akademik Yusif Məmmədəliyevin müstəsna rolu olmuşdur. Eyni zamanda, tələbələr Məmmədəliyevin 120 illik yubileyi münasibətilə hazırlanmış bədii filmi izləyiblər. Onlara Yusif Məmmədəliyevin neft-kimya elminin inkişafındakı müstəsna xidmətləri, Azərbaycan elminin formalaşmasına verdiyi töhfələr və zəngin elmi irsinin bu gün də uğurla davam etdirilməsi barədə qısa, lakin məzmunlu məlumat verilib.
Sonra tələbələr Yusif Məmmədəliyevin Muzeyini ziyarət edib, alimin həyat və fəaliyyətini əks etdirən eksponatlarla tanış olublar.
Görüş çərçivəsində tələbələr institutun nəzdində fəaliyyət göstərən laboratoriyalarda aparılan elmi-tədqiqat işləri ilə yaxından tanış olub, əldə etdikləri nəzəri bilikləri praktik mühitdə möhkəmləndirmək imkanı qazanıblar.
