https://innews.az/uploads/news/2025-12/_innews_b33e00f111b449801f3eb1e20_o.jpg
Azərbaycan Dövlət Neft və Sənaye Universitetində (ADNSU) “Konstitusiya və Suverenlik İli”nə həsr olunan Doktorantların və gənc tədqiqatçıların XXVIII Respublika elmi konfransı – NASCO XXVIII çərçivəsində ali təhsil və elmi sahədə qarşılıqlı əməkdaşlıq məqsədilə mühüm sənədlər imzalanıb.
Tədbirdə ADNSU ilə ölkənin müxtəlif ali təhsil müəssisələri arasında əməkdaşlığın genişləndirilməsini nəzərdə tutan memorandumlar rəsmiləşdirilib. Memorandumlar Azərbaycan Dövlət Aqrar Universiteti (ADAU), Sumqayıt Dövlət Universiteti, Lənkəran Dövlət Universiteti, Mingəçevir Dövlət Universiteti, Qarabağ Universiteti və Azərbaycan Universiteti ilə imzalanıb.
ADAU-nun rektoru Zəfər Qurbanov də imzalanma mərasimində iştirak edərək ADAU ilə ADNSU arasında birgə əməkdaşlıq haqqında sənədi imzalayıb. Sənəd ali təhsil və elmi-tədqiqat sahəsində əlaqələrin gücləndirilməsi, doktorant və gənc tədqiqatçıların elmi fəaliyyətlərinin stimullaşdırılması, birgə layihələrin hazırlanması və akademik mübadilə imkanlarının genişləndirilməsini əhatə edir.
İmzalanan memorandumlar çərçivəsində elmi konfransların, seminar və simpoziumların birgə təşkili, ortaq nəşrlərin hazırlanması, innovativ tədqiqatların dəstəklənməsi və müasir elmi çağırışlara uyğun yeni əməkdaşlıq mexanizmlərinin formalaşdırılması nəzərdə tutulur. Bu təşəbbüslər ölkənin ali təhsil müəssisələri arasında elmi əlaqələrin daha da möhkəmlənməsinə, gənc alim və tədqiqatçılar üçün beynəlxalq səviyyədə təcrübə və inkişaf imkanlarının genişlənməsinə xidmət edəcək.
