https://innews.az/uploads/news/2025-12/_innews_2229f9babcaca34cca2604fd4_o.jpg
Ailə, Qadın və Uşaq Problemləri üzrə Dövlət Komitəsinin sədri Bahar Muradova Böyük Britaniyada akademik və elmi fəaliyyət göstərən azərbaycanlı alimlər Aygün Azadova və Fərid Ədilov ilə görüşüb.
Görüş zamanı elm, təhsil və dövlət siyasətinin qarşılıqlı şəkildə bir-birini tamamladığı sahələrdə yeni yanaşmalar, əməkdaşlıq perspektivləri və gələcək planlar müzakirə olunub. Bahar Muradova bildirib ki, alimlərin ilin sonu – yeni ilin astanasında Azərbaycana səfəri qarşıdakı dövr üçün nəzərdə tutulan planların daha dəqiq və hədəfli şəkildə formalaşdırılmasına müsbət təsir göstərib.
Qeyd edilib ki, Aygün Azadova Dövlət Proqramı çərçivəsində Böyük Britaniyanın Essex Universitetində doktorantura təhsilini uğurla başa vurub və süd vəzi xərçəngi ilə bağlı elmi tədqiqatını yüksək səviyyədə müdafiə edib. O, iki il ərzində həmin universitetdə müəllim və fənn rəhbəri kimi Biologiya ixtisasını tədris edib və tələbələrlə apardığı uğurlu fəaliyyətə görə 2024-cü ildə “Təhsildə Mükəmməllik” mükafatı ilə təltif olunub. Bu nailiyyət Azərbaycan alimlərinin beynəlxalq akademik mühitdə qazandığı etimadın göstəricisi kimi dəyərləndirilib.
Fərid Ədilov isə uzun illər Ailə, Qadın və Uşaq Problemləri üzrə Dövlət Komitəsində, o cümlədən Xarici əlaqələr və protokol xidməti şöbəsinin müdiri vəzifəsində çalışaraq dövlət siyasətinin formalaşdırılması və icrası sahəsində geniş təcrübə əldə edib. Hazırda Essex Universitetinin Sosiologiya və Kriminologiya Departamentində doktorantura təhsili alır və müəllim kimi fəaliyyət göstərir. Onun tədqiqatı Azərbaycanın keys araşdırması əsasında qadınların milli qanunvericilik orqanlarında təmsilçiliyinin qərar qəbuletməyə təsirini araşdırır. Bildirilib ki, bu tədqiqatın nəticələrinin növbəti ildə Oxford Universitetində təqdim olunması ölkəmizdə həyata keçirilən siyasətin beynəlxalq elmi platformalarda tanıdılması baxımından mühüm əhəmiyyət daşıyır.
Görüşdə o da vurğulanıb ki, Aygün Azadova və Fərid Ədilov 15–16 dekabr 2025-ci il tarixlərində Qarabağ Universitetinin Biznes və İqtisadiyyat Fakültəsində akademik heyət və tələbələr üçün təlimlər keçiriblər. Akademik tərkib üçün təşkil olunan “Ali təhsildə tədris və öyrənmə” mövzulu təlimdə Birləşmiş Krallığın ali təhsil təcrübəsi, QAA yanaşmaları və PSF 2023 çərçivəsi müzakirə edilib. Tələbələr üçün keçirilən “Akademik oxu və yazı” təlimi isə onların beynəlxalq akademik standartlara uyğun bacarıqlarının inkişafına töhfə verib.
Bahar Muradova görüş zamanı xaricdə fəaliyyət göstərən azərbaycanlı alimlərin çalışdıqları universitetlərlə ölkə universitetləri arasında institusional əməkdaşlıqların, birgə tədqiqatların və akademik mübadilələrin qurulmasının vacibliyini xüsusi qeyd edib. Eyni zamanda, Fərid Ədilovun tədqiqat sahəsi nəzərə alınaraq Dövlət Komitəsi ilə elmi əsaslı əməkdaşlıq imkanlarının genişləndirilməsi və ölkədə həyata keçirilən siyasətin beynəlxalq müstəvidə daha geniş tanıdılması üçün yeni təşəbbüslər üzərində işləmək niyyəti ifadə olunub.
Sonda Komitə sədri Aygün Azadova və Fərid Ədilovu elmi fəaliyyətləri, şəxsi və ictimai həyatda qazandıqları nailiyyətlər münasibətilə təbrik edərək, onlara rifah və uğurlar arzulayıb.
