https://innews.az/uploads/news/2026-01/_innews_e8f19acd410cf155570d8278a_o.jpg
2025-ci il ərzində Azərbaycan Dövlət Pedaqoji Universitetinin (ADPU) Həmkarlar İttifaqı Komitəsi əməkdaşların sosial rifahının yaxşılaşdırılması, onların hüquqlarının qorunması, eləcə də kollektivdə sosial həmrəyliyin və motivasiya mühitinin gücləndirilməsi istiqamətində sistemli fəaliyyət həyata keçirib.
İl ərzində mədəni-kütləvi tədbirlərin təşkili Komitənin əsas fəaliyyət istiqamətlərindən biri olub. 8 Mart – Beynəlxalq Qadınlar Günü münasibətilə şəhid və qazi ailəsi üzvü olan əməkdaşlar, əməkdar müəllimlər və ictimai fəallığı ilə seçilən şəxlər daxil olmaqla ümumilikdə 164 nəfər qadın əməkdaşa hədiyyə və gül dəstələri təqdim edilib. Eyni zamanda, Ağcabədi filialında çalışan əməkdaşlar üçün bayram tədbirinin keçirilməsinə maddi dəstək göstərilib.
Milli-mənəvi dəyərlərimizin təbliği məqsədilə universitet əməkdaşlarının azyaşlı övladları üçün 400 ədəd Novruz bayramı şənliklərində iştirak bileti təmin edilib. Ramazan bayramı münasibətilə isə 297 nəfər aztəminatlı əməkdaş bayram sovqatı ilə təmin edilib. 5 Oktyabr – Beynəlxalq Müəllimlər Günü münasibətilə tədris prosesində mühüm rol oynayan struktur bölmələrin əməkdaşlarına hədiyyələr verilib. 31 Dekabr – Dünya Azərbaycanlılarının Həmrəyliyi Günü və Yeni il bayramı münasibətilə bayram şənliyinə ADPU üzrə 650, Şəki filialı üzrə isə 100 ədəd bilet alınaraq əməkdaşların ailə üzvlərinə təqdim edilib.
2025-ci ildə Komitə tərəfindən motivasiya və təltif tədbirlərinə də xüsusi diqqət yetirilib. Universitetin ictimai həyatında fəallığı və uzunmüddətli səmərəli fəaliyyəti ilə seçilən 97 nəfər Həmkarlar İttifaqı üzvü doğum günləri münasibətilə fəxri fərman, pul mükafatı və hədiyyələrlə təltif olunublar. 8 Noyabr – Zəfər Günü münasibətilə universitetdə çalışan 6 nəfər şəhid ailəsi üzvünə və 8 nəfər müharibə iştirakçısına maddi yardım göstərilib.
Əməkdaşların hüquqlarının qorunması istiqamətində 2025–2027-ci illəri əhatə edən dövr üçün ADPU ilə Həmkarlar İttifaqı Komitəsi arasında “Kollektiv Müqavilə” imzalanıb.
İl ərzində Həmkarlar İttifaqına daxil olan kollektiv müraciətlər operativ şəkildə araşdırılıb, əmək hüquqları, iş şəraiti və sosial məsələlərlə bağlı bir sıra müraciətlər müsbət həllini tapıb.
Sosial dəstək tədbirləri çərçivəsində il ərzində müraciət və ehtiyaclar nəzərə alınmaqla 283 nəfər əməkdaşa maddi yardım göstərilib. Bundan əlavə, 12 nəfər əlilliyi olan əməkdaşın əməkhaqqının 15–25 faiz artırılması ilə bağlı edilən müraciət müsbət nəticələnib.
Sağlamlıq və istirahətin təşkili məqsədilə ailə üzvləri ilə birlikdə 187 nəfər Həmkarlar İttifaqı üzvü respublikanın müxtəlif istirahət və sağlamlıq mərkəzlərinə göndərilib. Yollayışların dəyərinin 85 faizi Həmkarlar İttifaqı Komitəsi tərəfindən, 15 faizi isə əməkdaşlar tərəfindən ödənilib.
Asudə vaxtın səmərəli təşkili məqsədilə yay aylarında ümumilikdə 348 nəfər əməkdaşın respublikanın müxtəlif bölgələrinə birgünlük istirahət səfərləri təşkil edilib. Eyni zamanda, Filologiya fakültəsindən 25 nəfər, Riyaziyyat fakültəsindən isə 20 nəfər əməkdaş üçün Quba rayonunda yerləşən istirahət mərkəzinə birgünlük tur təşkil olunub, səfərlə bağlı bütün xərclər Həmkarlar İttifaqı Komitəsi tərəfindən tam şəkildə qarşılanıb.Bununla yanaşı, mədəni-kütləvi tədbirlər çərçivəsində “Viva Opera” adlı bağlanış konserti üçün 100 ədəd bilet təmin edilib, Şamaxı filialında Şuşa Dövlət Milli Dram Teatrının tamaşasının nümayişinə maliyyə dəstəyi göstərilib.
Həmkarlar İttifaqı Komitəsi universitet əməkdaşlarının sosial müdafiəsinin gücləndirilməsi, onların rifahının yaxşılaşdırılması və kollektivdə sağlam sosial mühitin formalaşdırılması istiqamətində ardıcıl fəaliyyəti növbəti illərdə də davam etdirməyi planlaşdırıb.
