https://innews.az/uploads/news/2026-01/_innews_3054b1f8c8b67cae5f56fd7af_o.jpg
Azərbaycan xalqının azadlıq və müstəqillik uğrunda mübarizə tarixində 20 Yanvar faciəsi silinməz izlər buraxmışdır. 1990-cı il yanvarın 20-də sovet imperiyasının Bakıda və respublikanın bir sıra bölgələrində dinc əhaliyə qarşı törətdiyi qanlı qırğın yalnız faciə deyil, eyni zamanda xalqımızın milli oyanışının, azadlıq iradəsinin və müstəqil dövlətçilik əzminin təzahürü olmuşdur.
Ümummilli Lider Heydər Əliyev 20 Yanvar hadisələrinə daim obyektiv siyasi-hüquqi qiymət vermiş, bu faciəni Azərbaycan xalqına qarşı törədilmiş ağır cinayət kimi xarakterizə etmişdir. Onun “20 Yanvar hadisələri Azərbaycan xalqının tarixində həm böyük faciə, həm də qəhrəmanlıq səhifəsidir” fikri bu gün öz təsdiqini daha aydın şəkildə tapır. Zaman keçdikcə həmin günün mahiyyəti, onun müstəqilliyimiz yolundakı rolu daha dərindən dərk olunur.
20 Yanvar faciəsi göstərdi ki, Azərbaycan xalqı öz azadlığından, milli ləyaqətindən vaz keçmək niyyətində deyil. Sovet ordusunun ağır texnika və silahlarla dinc insanlara qarşı çıxması xalqın iradəsini qıra bilmədi, əksinə, müstəqillik arzularını daha da gücləndirdi. Bu hadisə Azərbaycan Respublikasının müstəqilliyinə gedən yolun dönüş nöqtələrindən biri oldu.
Ulu Öndər Heydər Əliyevin hakimiyyətə qayıdışından sonra 20 Yanvar faciəsinə ilk dəfə olaraq dövlət səviyyəsində siyasi qiymət verildi. 1994-cü ildə Milli Məclisin qərarı ilə bu qanlı hadisələrə hüquqi-siyasi qiymət verilməsi tarixi ədalətin bərpası baxımından mühüm addım oldu. Şəhidlərin xatirəsi əbədiləşdirildi, 20 Yanvar Ümumxalq Hüzn Günü kimi təsbit edildi.
Bu gün müstəqil, qalib Azərbaycan dövləti 20 Yanvar şəhidlərinin arzularını gerçəkləşdirərək öz suverenliyini tam bərpa etmişdir. Xüsusilə Vətən müharibəsində qazanılan Zəfər göstərdi ki, xalqımızın azadlıq uğrunda tökülən qanı yerdə qalmamışdır. Bu baxımdan, Heydər Əliyevin uzaqgörənliklə söylədiyi fikirlər bu gün daha aydın və real görünür.
20 Yanvar faciəsi təkcə keçmişin acı xatirəsi deyil, eyni zamanda gələcək nəsillər üçün bir dərsdir. Bu tarix bizə azadlığın, müstəqilliyin hansı bədəllər bahasına əldə edildiyini xatırladır və milli birliyimizin, dövlətçiliyimizin möhkəmləndirilməsinin vacibliyini bir daha nümayiş etdirir.
Nəticə etibarilə, Ümummilli Lider Heydər Əliyevin dediyi kimi, 20 Yanvarın tariximizdə tutduğu yer bu gün daha aydın görünür. Bu gün biz həmin faciəyə artıq müstəqil dövlətin və qalib xalqın gözü ilə baxır, şəhidlərimizin xatirəsini dərin ehtiramla anırıq.
YAP Şirvan şəhər təşkilatının məsləhətçisi
İsrayılov Amil Faiq oğlu
Ən son xəbərləri səhifəmizdən də izləyin
