https://innews.az/uploads/news/2026-04/_innews_878060f1340ad5182059e14e6_o.jpg
Azərbaycan Respublikası Mədəniyyət Nazirliyinin keçirdiyi Qeyri-Hökumət Təşkilatları üçün Mədəni və Yaradıcı Sənayelər üzrə xüsusi qrant müsabiqəsinin qalibi “Hüquqi Tədqiqatlar Mərkəzi” ictimai birliyi tərəfindən “Əqli mülkiyyət hüququ sahiblərinin məlumatlandırılması” layihəsi çərçivəsində “Əqli mülkiyyət hüququ nədir və onu necə qorumalı?” mövzusunda növbəti təlim aprelin 3-də Azərbaycan Dövlət Pedaqoji Universitetinin Quba filialında keçirildi.
Təlimdən öncə filialın direktoru, fizika-riyaziyyat elmləri doktoru, professor Yusif Alıyev ADPU-nun Quba filialının yaranması, tarixi, strukturu, filialın ixtisaslaşdırılmış tədris otaqları, əldə edilən uğurlar, keçirilən tədbirlər, konfranslar və filialın beynəlxalq əlaqələri barədə “Hüquqi Tədqiqatlar Mərkəzi” İB-nin üzvlərinə və ekspertlərə geniş məlumat verdi, onları filialda yaradılmış Azərbycan-Özbəkistan Əlaqələri Mərkəzi ilə tanış etdi.
Təlim Türk dövlətlərinin bayraqları ilə bəzədilmiş bu Mərkəzdə keçirildi. Ölkəmizin ərazi bütövlüyü və suverenliyi uğrunda canından keçmiş şəhidlərimiz bir dəqiqəlik sükutla anıldıqdan sonra tədbiri giriş sözü ilə açan ADPU-nun Quba filialının direktoru, professor Yusif Alıyev filialda həyata keçirilən təhsil proqramları, professor-müəllim heyətinin elmi-pedaqoji fəaliyyəti, həmçinin filialda aparılan elmi-tədqiqat işləri, həmçinin keçiriləcək təlimin məqsədi barədə ətraflı məlumat verərək, həmin təlimin filial əməkdaşları, eləcə də təlimdə iştirak edən şəhərin yaradıcı ziyalıları üçün mühüm əhəmiyyət kəsb etdiyini qeyd etdi.
Quba və ətraf rayonlarda yaşayan elm, mədəniyyət, ədəbiyyat, incəsənət sahəsində fəaliyyət göstərən yaradıcı ziyalıların və filialın professor-müəllim heyətinin iştirak etdiyi təlimdə giriş sözü ilə çıxış edən “Hüquqi Tədqiqatlar Mərkəzi” İB-nin rəhbəri, Bakı Dövlət Universiteti Hüquq fakültəsinin dosenti Bəxşeyiş Əsgərov təlimin Azərbaycan-Özbəkistan Əlaqələri Mərkəzində keçirilməsinin rəmzi xarakter daşıdığını, ölkəmizin Türk Dövlətləri Təkilatına müxtəlif sahələrdə, o cümlədən əqli mülkiyyət hüququ sahəsində inteqrasiya istiqamətində apardığı məqsədyönlü siyasətin əhəmiyyətini qeyd edərək, rəhbərlik etdiyi təşkilatın fəaliyyəti, ölkəmizdə hüquqi biliklərin təbliği, hüquq düşüncəsi və hüquq mədəniyyətinin yüksəldilməsi istiqamətində gördükləri işlər, eləcə də Azərbaycan Respublikası Mədəniyyət Nazirliyinin Mədəni və Yaradıcı Sənayelərin inkişafı, yaradıcı insanların hüquqlarının qorunması, onların yaradıcılıq potensialının artırılması sahəsində həyata keçirdiyi siyasət, Nazirliyin yaradıcı ziyalılarımızın hüquqlarının qorunması məsələsinə həssas münasibəti və bu istiqamətdə vətəndaş cəmiyyəti institutları ilə qarşılıqlı əməkdaşlığı barədə ətraflı məlumat verdi.
Ölkəmizdə müəllif hüquqları ilə bağlı qanunvericiliyin mahiyyətinə, bu sahədə dövlət siyasətini həyata keçirən Azərbaycan Respublikası Əqli Mülkiyyət Agentliyinin uğurlu fəaliyyətinə toxunan B.Əsgərov müəlliflərin öz hüquqlarını bilməsinə və onun qorunmasında özlərinin fəal iştirakına xüsusi diqqət yetirdi.
Tədbirdə iştirak edən Azərbaycan Respublikası Əqli Mülkiyyət Agentliyinin Əqli Mülkiyyət Hüquqlarının Təminatı Mərkəzinin şöbə müdiri Vüsal Quliyev ölkəmizdə konstitusion hüquq olan əqli mülkiyyət və yaradıcılıq hüquqlarının tanınması, qorunması, təbliği və inkişafı ilə bağlı dövlət siyasətindən, elm, mədəniyyət, incəsənət sahəsində çalışan yaradıcı insanların əməyini stimullaşdırmaq üçün Əqli Mülkiyyət Agentliyinin gördüyü işlərdən danışdı.
Layihənin ekspertləri hüquqşünas Aydın Kərimov və əqli mülkiyyət hüququ sahəsində tanınmış ekspert Natiq İsayevin interaktiv qaydada apardıqları praktiki əhəmiyyətli təlimdə əqli mülkiyyət hüququnun mahiyyəti, onun tanınma, qorunma və müdafiə mexanizmləri, əqli mülkiyyət və insan kapitalı, elmi, tədris və ədəbi əsərlərin mətnlərində plagiat halları və onun qarşısının alınması, əqli mülkiyyət obyektlərinin kommersiyalaşdırılması s. barədə geniş məlumar verildi.
Regionda fəaliyyət göstərən 100-ə yaxın yaradıcı şəxsi əhatə edən Azərbaycan Yazıçılar Birliyinin regional bölməsinin rəhbəri, tanınmış şair Ramiz Qusarçaylı dəyişən ictimai-siyasi, iqtisadi, sosial və mədəni mühitdə yaradıcı insanların üzləşdikləri problemlərdən söz açdı. Bu problemlərin həlli üçün müəllif hüquqlarının düzgün tənzimlənməsini vacib saydı. Mədəniyyət Nazirliyinə, Əqli Mülkiyyət Agentliyinə, “Hüquqi Tədqiqatlar Mərkəzi”nə və ADPU Quba filialının rəhbərliyinə belə aktual, ədəbiyyatın və elmi tədqiqatların inkişafına təkan verən, hər bir yaradıcı şəxs üçün faydalı olan tədbirin keçirilməsinə görə təşəkkür etdi.
Elm sahəsində Dövlət mükafatı laureatı, professor Hacı Həsənov qanunçuluğa hörmətlə yanaşılmasının hələ Türk xalqlarının gələnəyindən irəli gəlməsini, “türklərin tarix yaratdıqları, amma tarix yazmadıqları”nı, eləcə də dünyaca tanınmış alimimiz Lütfizadənin qeyri-səlis məntiq nəzəriyyəsinə öz müəlliflik hüquqlarını rəsmiləşdirməməsini misal göstərərək keçirilən təlimin yaradıcı şəxslər üçün nə qədər əhəmiyyətli olduğunu iştirakçıların diqqətinə çatdırdı, əqli mülkiyyət hüququ sahəsində maarifçiliyin əhəmiyyətini qeyd etdi.
Təlim iştirakçıların fəallığı şəraitində keçdi. Xüsusilə, filialda çalışan alimlər bu sahədə üzləşdikləri çətinliklərdən danışdılar, mövzu ilə bağlı münasibətlərini bildirdilər, layihənin ekspertlərinə suallar ünvanladılar. Ekspertlər qaldırılan məsələlərlə bağlı geniş izahat verdilər.
Tədbirin sonunda Azərbaycan Respublikası Əqli Mülkiyyət Agentliyinin İdarə Heyətinin sədri, professor Kamran İmanovun rəhbərliyi və müəllifliyi ilə dərc olunmuş əqli mülkiyyət hüququnun müxtəlif sahələrinə dair çoxsaylı kitablar və vəsaitlər ADPU Quba filialının kitabxanasına verildi. “Hüquqi Tədqiqatlar Mərkəzi” İB-nin Agentliyin metodiki dəstəyi ilə layihənin mövzusu üzrə hazırladığı qanunvericilik aktlarından ibarət toplu isə tədbir iştirakçılarına paylandı.
ADPU Quba filialının direktoru, prof. Yusif Alıyev elm və mədəniyyət xadimlərinin əqli mülkiyyət hüquqlarının qorunması və təbliği, eləcə də yaradıcı şəxslərin sosial rifahının yaxşılaşdırılması sahəsindəki uğurlu fəaliyyətlərinə görə “Hüquqi Tədqiqatlar Mərkəzi” İB-nin rəhbəri Bəxşeyiş Əsgərova, “Müstəqil Hüquq Mərkəzi” İB-nin sədri, layihənin hüquqşünası Aydın Kərimova və əqli mülkiyyət hüququ sahəsində tanınmış ekspert Natiq İsayevə Azərbaycan Dövlət Pedaqoji Universitetinin Quba filialının “Fəxri Diplomu”nu təqdim etdi.
Təlim iştirakçıları birgə xatirə şəkili çəkdirdilər.
