ADPU tələbələri “Fibonacci” Beynəlxalq Robot Olimpiadasında Avrasiya çempionu olublar

22-26 aprel 2026-cı il tarixlərində Türkiyə Respublikasının Antalya şəhərində “Fibonacci” Beynəlxalq Robot Olimpiadasının Avrasiya çempionatı keçirilib. Yarışmada dünyanın 21 ölkəsindən 639 komanda, 3000-dən artıq iştirakçı qələbə uğrunda mübarizə aparıb.

Azərbaycan Dövlət Pedaqoji Universitetinin (ADPU) Riyaziyyat fakültəsinin Kompüter elmləri kafedrasının müəllimi Xumarə Nəsirlinin mentorluğu ilə fakültənin tələbələri Günay Cəfərova, Elvin Əzizli və fakültənin məzunu Türkanə Qəhrəmanlıdan ibarət komanda 5 kateqoriya üzrə mübarizəyə qoşuluba. Komanda “RoboTech Entrepreneurship BlueTech”, “Entrepreneurship” və “HealthTech Entrepreneurship” kateqoriyaları üzrə I yerə, “Autonomous Car” kateqoriyası üzrə II, “SoftTech Entrepreneurship” kateqoriyası üzrə III yerə yerə layiq görülüb.

Çempionatın qalibi olan komandalar İtalyada keçiriləcək “Fibonacci Beynəlxalq Robot Olimpiadası”nın final mərhələsində iştirak hüququ qazanıblar.

Aprelin 28-də isə Azərbaycan Dövlət Pedaqoji Universitetinin rektoru professor Cəfər Cəfərov, tədris işləri üzrə prorektoru dosent Eldar Aslanov və Riyaziyyat fakültəsinin dekanı dosent Allahverdi Cəfərov komanda üzvləri ilə görüşərək onları təbrik edib, təəssüratlarını dinləyiblər.

Qeyd edək ki, İtalyada əsası qoyulan “Fibonacci” Beynəlxalq Robot Olimpiadası dünyanın ən böyük robot olimpiadası hesab edilir.