https://innews.az/uploads/news/2026-07/_innews_c79da4543df466b249416449a_o.jpg
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Koxlear implantlı uşaqların həyata adaptasiyası və valideynlərin maarifləndirilməsi" layihəsinin icrasına 1 iyul 2026-cı il tarixində start verilib.
"innews media" xəbər verir ki, layihə iki ay müddətində həyata keçiriləcək. Layihənin rəhbəri Mehriban Hüseynovadır.
Layihənin əsas məqsədi koxlear implantlı uşaqların cəmiyyətə uğurlu inteqrasiyasına və həyata adaptasiyasına dəstək göstərmək, valideynlərin bu sahədə bilik və məlumatlılığını artırmaq, eyni zamanda koxlear implant sahəsində çalışan mütəxəssislərlə ailələr arasında əməkdaşlığı və təcrübə mübadiləsini gücləndirməkdir.
Layihə çərçivəsində hər biri 100 nəfərin iştirakı ilə iki geniş maarifləndirici tədbir keçiriləcək. Tədbirlərdə koxlear implantlı uşaqlar və onların valideynləri, koxlear implant istifadəçiləri, həkimlər, lor-cərrahlar, audioloqlar, surdoloqlar, loqopedlər, defektoloqlar, psixoloqlar və digər aidiyyəti mütəxəssislər iştirak edəcəklər.
Tədbirlər zamanı iştirakçılar koxlear implant əməliyyatına aparan bütün mərhələlər barədə ətraflı məlumatlandırılacaqlar. Dövlət dəstəyi ilə koxlear implant əməliyyatının həyata keçirilməsi qaydaları, eşitmə dərəcəsinin qiymətləndirilməsi, koxlear implant namizədinin seçilməsi meyarları, əməliyyat zamanı yarana biləcək məqamlar, əməliyyatdan sonrakı reabilitasiya prosesi, nitqin inkişafı, cihazın düzgün istifadəsi, sosial adaptasiya və ailənin bu prosesdə rolu sahənin peşəkar mütəxəssisləri tərəfindən təqdimatlar və praktiki tövsiyələr əsasında izah olunacaq.
Tədbirlərin sonunda bütün iştirakçılara sertifikat təqdim ediləcək.
"Koxlear İmplantlı Şəxslərə Sosial Yardım" İctimai Birliyi 2022-ci ildən fəaliyyət göstərir. Birlik yarandığı gündən etibarən yüzlərlə eşitmə məhdudiyyətli uşağın koxlear implant əməliyyatına yönləndirilməsinə, onların dövlət dəstəyindən faydalanmasına, reabilitasiya prosesinə və cəmiyyətə uğurlu inteqrasiyasına dəstək göstərmişdir. Erkən yaşda koxlear implant əməliyyatı olunan uşaqların böyük əksəriyyəti bu gün yaşıdları ilə birlikdə təhsil alır, ünsiyyət qurur və cəmiyyətin fəal üzvləri kimi həyatlarını davam etdirirlər.
İctimai Birliyin əsas məqsədi eşitmə məhdudiyyətli uşaqların erkən diaqnostikasına, vaxtında koxlear implant əməliyyatına yönləndirilməsinə, ailələrin düzgün məlumatlandırılmasına, dövlət dəstəyi mexanizmləri barədə maarifləndirilməsinə və koxlear implant vasitəsilə onların sağlam həyata qovuşmasına töhfə verməkdir.
Layihə çərçivəsində keçiriləcək tədbirlər valideynlərin suallarının cavablandırılması, mütəxəssislərlə birbaşa ünsiyyət qurulması və iştirakçıların ən aktual mövzular üzrə dolğun məlumat əldə etməsi baxımından mühüm əhəmiyyət daşıyır. Layihənin nəticəsi olaraq ailələrin məlumatlılıq səviyyəsinin yüksəldilməsi, uşaqların reabilitasiya və sosial adaptasiya prosesinin daha səmərəli təşkil olunmasına töhfə verilməsi nəzərdə tutulur.
"İkinci səs olaq, sükuta həyat verək!"
“Koxlear implant möcüzədir “-minlərlə uşağın yenidən eşitmək, danışmaq və həyata bərabər imkanlarla qoşulmaq şansdır .
Ən son xəbərləri səhifəmizdən də izləyin
