https://innews.az/uploads/news/2026-11/_innews_7008da342492a58bb4f1b8ad4_o.jpg
İnsan alveri müasir cəmiyyətin ən ciddi sosial və humanitar problemlərindən biri olaraq qalır. Bu cinayətlə mübarizədə hüquqi və sosial mexanizmlərlə yanaşı, insan alverinə şərait yaradan psixoloji amillərin öyrənilməsi və risk qruplarının psixoloji müdafiəsinin gücləndirilməsi də mühüm əhəmiyyət daşıyır.
“Peşəkar Psixoloqlar” İctimai Birliyinin sədri, psixoloq Səbinə İsmayılova insan alverinin psixoloji tərəflərinə diqqət çəkərək bildirir ki, emosional həssaslıq, sosial təcrid, özünəinamın aşağı olması, təhlükəsiz münasibətlərə ehtiyac və çətin həyat şəraiti insanların manipulyasiyaya qarşı həssaslığını artıra bilər.
Onun sözlərinə görə, zorakılıq, ailədaxili problemlər, sosial-iqtisadi çətinliklər və psixoloji dəstəyin çatışmazlığı ilə üzləşən şəxslər bəzən qarşılarına çıxan saxta iş, təhsil və digər imkanları kifayət qədər qiymətləndirmədən qəbul edə bilirlər. İnsan alverçiləri isə etimad yaratmaq, yalan vədlər vermək və emosional manipulyasiya vasitəsilə insanların həssas vəziyyətindən sui-istifadə edirlər.
Xüsusilə yeniyetmələr və gənclər arasında sosial şəbəkələr vasitəsilə qurulan saxta münasibətlər, qeyri-real uğur vəd edən təkliflər və aldadıcı iş imkanları risklərin artmasına səbəb ola bilər. Buna görə də gənclərdə tənqidi düşüncə, rəqəmsal təhlükəsizlik, özünəinam və təhlükəli vəziyyətləri tanımaq bacarıqlarının inkişaf etdirilməsi vacibdir.
Səbinə İsmayılova vurğulayır ki, insan alverindən zərər çəkmiş şəxslərin susması və kömək istəməkdə çətinlik çəkməsi də problemin həllini mürəkkəbləşdirən amillərdəndir. Qorxu, utanc, günahkarlıq hissi və yaşanmış travmalar onların baş verənlər haqqında danışmasına mane ola bilər. Bu səbəbdən zərərçəkmiş şəxslərə mühakimə etmədən yanaşmaq, məxfiliyi qorumaq və peşəkar psixoloji dəstək göstərmək xüsusi əhəmiyyət daşıyır.
İnsan alverinin qarşısının alınması yalnız hüquqi tədbirlərlə məhdudlaşmamalıdır. Ailələrdə, təhsil müəssisələrində və cəmiyyətdə davamlı maarifləndirmə işlərinin aparılması, risk qruplarının müəyyənləşdirilməsi, psixoloji dayanıqlılığın gücləndirilməsi və dəstək xidmətlərinə əlçatanlığın artırılması kompleks mübarizənin vacib istiqamətləridir.
“Peşəkar Psixoloqlar” İctimai Birliyi hesab edir ki, insan alverinə qarşı mübarizədə psixoloji maarifləndirmə və preventiv yanaşmalar gücləndirilməli, hər bir insanın təhlükəsiz yaşamaq, məlumatlı qərar vermək və ehtiyac duyduğu dəstəyi almaq imkanları təmin edilməlidir.
Səbinə İsmayılova
“Peşəkar Psixoloqlar” İctimai Birliyinin sədri
Ən son xəbərləri səhifəmizdən də izləyin
