https://innews.az/uploads/news/2023-02/_innews_ea73d9ed555607e294a11c081_o.jpg
Fevralın 14-də Azərbaycan Respublikası Milli Paralimpiya Komitəsinin, Milli Abilimpiya Federasiyasının prezidenti İlqar Rəhimov və Almaniya Federativ Respublikasının Azərbaycandakı səfiri Dr.Ralf Horlemann arasında görüş keçirilib.
Görüşdə Komitə prezidentinin köməkçisi, idman şöbəsinin müdiri Kamal Məmmədov, Milli Abilimpiya Federasiyasının vitse-prezidenti Rüfət Hacılı, Almaniyanın Azərbaycandakı səfirinin müavini Hayko Şvarts, Komitə, Federasiya və səfirliyin əməkdaşları iştirak ediblər.
Komitə prezidenti İlqar Rəhimov ölkəmizdə paralimpiya hərəkatının inkişafı sahəsində görülmüş işlər, əldə olunmuş nailiyyətlər və gələcək fəaliyyətlər barədə səfirə məlumat verib. İ.Rəhimov bildirib ki, Yaponiyanın paytaxtı Tokioda keçirilmiş XVI Yay Paralimpiya Oyunlarında Azərbaycan milli komandası 14 qızıl, 1 gümüş və 4 bürünc olmaqla ümumilikdə 19 medal qazanaraq Oyunları 10-cu pillədə başa vurub. Eyni zamanda, İ.Rəhimov Almaniya millisinin də Tokioda əldə etdiyi nəticələri yüksək qiymətləndirərək vurğulayıb ki, Almaniya Paralimpiya Komitəsi ilə əlaqələrin genişləndirilməsi hər iki ölkədə paralimpiya hərəkatının inkişafına daha da təkan verəcək. Komitə prezidenti İ.Rəhimov xatırladıb ki, 2019-cu ildə Almaniya Federal Xarici İşlər Nazirliyi Milli Paralimpiya Komitəsinin qış idman növləri üzrə milli komandasına dəstək vermişdir.
İlqar Rəhimov ölkəmizdə fiziki məhdudiyyətli şəxslərə xüsusi diqqət göstərildiyini, Prezident İlham Əliyevin tapşırığı ilə müvafiq dövlət qurumları tərəfindən bu istiqamətdə mühüm işlər görüldüyünü qeyd edib. İ.Rəhimov ölkəmizdə sürətlə inkişaf edən abilimpiya hərəkatı haqqında səfirə məlumat verib, O, bildirib ki, Azərbaycan abilimpiyaçıları 22-25 mart 2023-cü il tarixlərində Fransanın Mets şəhərində keçiriləcək X Beynəlxalq Abilimpiya Çempionatında iştirak edəcək.
Almaniya Federativ Respublikasının Azərbaycandakı səfiri Dr.Ralf Horlemann görüş üçün təşəkkürünü bildirib. O, paralimpiya və abilimpiya hərəkatlarının fiziki məhdudiyyətli insanların cəmiyyətə inteqrasiyası və özlərini inkişaf etdirməsi üçün prioritet sahələrdən biri olduğunu diqqətə çatdırıb. Eləcə də Almaniyada bu sahələrə geniş marağın olduğunu qeyd edib.
Daha sonra tərəflər arasında birgə əməkdaşlıq mövzusunda geniş müzakirələr aparılıb.
Ən son xəbərləri səhifəmizdən də izləyin
