https://innews.az/uploads/news/2023-03/_innews_0c758a7ac014ed4c1078028fa_o.jpg
Qadın gülərsə, bu ıssız mühitimiz güləcək,
Sürüklənən bəşəriyyət qadınla yüksələcək
– deyirdi, Cavid Əfəndimiz. Şairin əsərləri, ümumilikdə yaradıcılığında qadın adı hər zaman uca məqamı ilə seçilir. Həqiqətən də yer üzündə gördüyümüz hər nə varsa qadının əsəri adlandıra bilərik. Bələki, qadın qəlbinin hərarətindən günəşə, üzünün nurundan səmaya, gözünün işığından aya pay verib.
Azərbaycan qadını daim öz mərdliyi, cəsarətilə seçilib.Tariximizdə öz namusunu oğlunun həyatından üstün tutan Burla xatun, Şərqin ilk diplomatik qadını Sara xatun, mərdliyi ilə ürəklərə yol tapan Xan qızı Natəvan kimi qadınlarımız var.
Azərbaycan qadını bəzən çiçəktək zərif, bəzən də aslantək güclü olmağı bacarır.
Anasız olmasın ömrü heç kəsin
Cahan bir yanadır, o bir yanadır
Everest zirvəsi qoy inciməsin
Dünyada ən böyük zirvə Anadır
–deyərək, şair qələm mürəkkəbi ilə Tanrının yaratdığı qadını ucadan da uca bilir. Həqiqətən də hər bir qadın üçün ən şərəfli ad, ən uca məqam – ANADIR. Əbəs yerə deyildi ki, sevgili Peyğəmbərimiz "behişt anaların ayaqları altındadır" deyib.
Bu gün həm də bizə həyat verən, həyatı sevdirən anaların günüdür. Düşünürəm ki, bu həyatda ən gözəl nəğmə ana laylası, ən doğma yer ana qucağı, ən saf məhəbbət ana sevgisidir.
Azərbaycan Şifahi Xalq Ədəbiyyatının ən parlaq nümunəsi “Kitabi-Dədə Qorqud” dastanında Ana haqqı Tanrı haqqına bərabər tutulur. O qədər müqəddəsdirlər ki, ən qədim zamanlardan klassiklərimiz, yazarlarımız anaları tərənnüm etmək sevdasından usanmırlar...
Ədəbiyyatımızda Anaya sevgi, rəğbət sonsuzdur. Hüseyn Cavidin “Ana”faciəsində yaratdığı Səlma ana obrazı nəinki Azərbaycan ədəbiyyatının, həmçinin dünya ədəbiyyatının ən mərhəmətli obrazı hesab edilir. Səlma Ananın qəlbindəki mərhəmət hissi o qədər güclü idi ki... O, həsrətlə yolunu gözlədiyi oğlunun qatilini belə bağışlayır. Belə bir Mərhəmətli obraza Cəlil Məmədquluzadənin “Anamın Kitabı” əsərində də rast gəlirik. Zəhrabəyim ana son nəfəsində də övladlarını düşünür, onları birliyə çağırır.
Ədəbiyyatımızda lirik qəhrəmanlar arasında ən təsirli “Ana”şeirini yazan fikrimcə Bəxtiyar Vahabzadədir:
Anam namaz üstə əl açıb göyə
Allaha yalvarır “ya rəbbim! – deyə:
- Sənsən xəlq eliyən göyləri, yeri,
Candan şirin olur bala, ay Allah.
Sən mənim ömrümdən kəsib illəri,
Balamın ömrünə cala, ay Allah!
Bu nədir? Arzuya, diləyə bir bax,
Gör bir nələr keçir ana qəlbindən?
Çoxdur bu dünyada hədiyyə… ancaq
Ömürdən hədiyyə görməmişəm mən.
Göründüyü kimi, şairin təbirincə desək, analar öz ömürlərindən bizə hədiyyə verir. Biz isə onlara öz sevgimizi, diqqətimizi hədiyyə etməliyik. Ana zəhmətini, haqqını danmaq olmaz.
Başda analarımız olmaqla əziz xanımlarımızı bu özəl gün münasibətilə ürəkdən təbrik edirəm. Sevincdən hər zaman üzümüzdə güllər açsın, xoşbəxtlik həmdəmimiz olsun, həyat yolunda böyük uğurlara imza ataq.
Sonda yazını çağdaş Azəbaycan ədəbiyyatının qüdrətli şairi Vahid Əzizin şeiri ilə yekunlaşdırmaq istərdim:
Səmtinə yelkəndir əsən küləyin,
ağrısın çəkəndir sevən ürəyin,
qadına – “kişitək qadın” – deməyin,
həm sakit, həm çılğın dənizdı qadın…
Süleymanova Nəzrin, BDU-nun Jurnalistika fakültəsinin tələbəsi
Ən son xəbərləri səhifəmizdən də izləyin
