https://innews.az/uploads/news/2023-04/_innews_613808988347b35ae693104de_o.jpg
Adəm – bəşəriyyətin atası yarandıqdan sonra onun yaşayışı üçün bəzi ehtiyacları var idi. Onun tənhalıqdan əziyyət çəkdiyi, həm də könül həmdəminə ehtiyac duyduğu üçün Həvva yaradıldı. Tanrı onun yaradılışını da eynilə Adəm kimi kamilləşdirdi. Yəni ,bərabər oldular...
Tarix boyu iki cins arasında “üstünlük” savaşı gedib. İki tərəf də bir-birindən üstün olduğunu iddia edib.Bu məsələdə ən çox səsini çıxaran isə qadınlar olur.
Bəs bunun səbəbi nədir: kim daha üstündür?
Məsələyə diqqət yetirsək əslində mövzunun üstünlük olmadığını anlayarıq. Belə ki, üstünlük deyilən bir anlayış yoxdur. Heç kim heç kimdən üstün deyil. Sadəcə birinin həyat imkanları daha geniş, digərinin isə məhduddur. Bu, eynən iki cins arasında gedən mübahisəyə də aiddir.
Qədim zamanlardan kişilərə, oğlanlara daha geniş həyat imkanları verilib. Bunun nəticəsidir ki, çox zaman kişilərin özlərini daha üstün tutduğunun və qadınlara aciz varlıq kimi baxdığının şahidi oluruq. Amma qadın heç də aciz deyil. Buna sübut olaraq deyə bilərəm ki, Azərbaycan qadını qədim zamanlardan at belində olub, qılınc oynadıb, hətta nizə atmağı belə bacarıb .
Bu məsələ ilə bağlı təkcə “Kitabi-Dədə Qorqud” dastanından bir parçanı xatırlamaq kifayətdir: “Boyu uzun Burla Xatun oğlunu andıqca qərarı qalmadı. Qırx incə belli qız-oğlanla Qara ayğırını çəkib mindi. Böyük qılıncla quşandı. “Başımın tacı Qazan gəlmədi” – deyə izinə düşüb getdi. Boyu uzun Burla Xatun kafirin qara bayrağını qılıncladı, yerə saldı".
Deməli, qadınlarımız çox güclüdür və azadlıqlarını məhdudlaşdırmaq olmaz. Kişi qədər qadının da söz haqqı olmalıdır. Unutmaq olmaz ki, qadın zərif varlıqdır, zəif deyil.
Kim daha üstündür? Məntiqli şəkildə düşünsək, əslində bu məsələnin həlli yolu çox sadədir.
Yuxarıda qeyd etdiyim kimi bəşəriyyət yaranandan iki cins var: kişi və qadın. Əgər bir cins daha üstün olsaydı və bütün dünyaya bəs etsəydi digər cins yaranmazdı. Demək ki, ikinci bir cinsə də ehtiyac duyulub və nəticə olaraq dünyada iki cins var kişi və qadın cinsi. Üçüncü cins yoxdur, deməli, bəşəriyyətin elə iki cinsə ehtiyacı var imiş. Elə mübahisəni burda da bitirmək olar.
Bəs bərabərlik nədir? Bərabərliyi dərk etsək belə əməllərimizə o bərabərliyi yansıtmırıq. Belə ki, dünya statistikasına və eləcə də Azərbaycan statistikasına baxsaq görərik ki,
ən çox şiddət görən qadınlardır. Nə üçün? Çünki hələ də şiddətin nələrinsə həllinə çarə olmadığını anlamayan insanlar var və əfsus ki, bunların böyük əksəriyyətini kişilər təşkil edir.
Təbii ki, hər kəsi bura aid etmək olmaz. Insan hüquqlarını çox yaxşı bilən, insanlara insan olduğu üçün qiymət verən və hörmət edən kişilər də az deyil. Bərabərlik anlayışını daha dərindən anlamaq üçün Gender (kişi və qadınların) bərabərliyinin təminatları haqqında Azərbaycan Respublikasının Qanununa nəzər yetirək: "Bu Qanunun məqsədi cinsi mənsubiyyətə görə ayrı-seçkiliyin bütün formalarını aradan qaldırmaqla, kişi və qadınlara ictimai həyatın siyasi, iqtisadi, sosial, mədəni və digər sahələrində bərabər imkanlar yaratmaqla gender bərabərliyinin təmin edilməsindən ibarətdir".
Deməli, qanuna əsasən də görürük ki, insanların hüquqları bərabərdir və
hüquqlarından istifadə etmək hər bir cinsin nümayəndəsinin haqqıdır.
Aydan Nəbiqızı, BDU-nun Jurnalistika fakültəsinin tələbəsi
Ən son xəbərləri səhifəmizdən də izləyin
