https://innews.az/uploads/news/2023-05/_innews_a812a3cb976eae7f832ee0127_o.jpg
Sentyabrın 27-si səhəri ermənilər öz mundar əməllərinə sadiq qalaraq, cəbhə xəttində geniş hərbi təxribata əl atdılar. Hərbi mövqelərimizi, mülki əhalini xaincəsinə hədəfə aldılar. Lakin müzəffər Azərbaycan Ordusu bunun cavabını artıqlaması ilə verdi. Ağdam, Füzuli, Cəbrayıl istiqamətində yerləşən ön xətdəki hərbi hissələrimiz, artilleriya bölmələrimiz və digər qoşun birləşmələrimiz Ermənistan silahlı qüvvələrinə sarsıdıcı zərbələr vurdu.
Prezident İlham Əliyevin siyasi iradəsi, hərbi biliyi, dönməz əqidəsi ilə ruhlanmış ulu xalq öz torpaqları uğrunda ölüm-dirim mübarizəsinə qalxdı.
Azərbaycan xalqı beynəlxalq səviyyədə tanınmış sərhədləri daxilində olan ərazi bütövlüyünü, suverenliyini, vətəndaşlarının pozulmuş hüquqlarını bərpa etmək üçün bir yumruqtək birləşərək, gücün birlikdə olduğunu bütün dünyaya sübut etdi.
Tarixi ədalətin, beynəlxalq hüququn Azərbaycan tərəfində olması, üstəlik də şanlı ordumuzun yenilməzliyi və xalqın mənəvi səfərbərliyi düşmənə ağır məğlubiyyətdən, rüsvayçı kapitulyasiyadan başqa bir şans vermədi.
Xalqımızın, torpağımızın 30 ildə başına gətirilən müsibətləri Azərbaycan ordusu 44 gündə düşmənin burnundan gətirdi.
Noyabrın 9-dək 5 şəhər, 4 qəsəbə və 286 kənd işğaldan azad edildi.
Tam qələbəmizə açılan yol isə 8 noyabr tarixindən keçdi. 1905, 1920 və 1992-ci ildə düşmən tərəfindən yandırılan, viran qoyulan müqəddəs Şuşa şəhəri Azərbaycan əsgərinin əlbəyaxa döyüşü, qılınc və qalxanı ilə azad olundu. Tarixi Şuşanın tarixini qoruyan Ali Baş Komandanımız xalqa: "Şuşa azaddır!" – xəbərini çatdırmaqla bu xalqı bir daha dirçəltdi. Xalqın Şuşa əzəmətini özünə qaytardı.
Və nəhayət Azərbaycan xalqının tarixinə, hərb səlnaməsinə qızıl hərflərlə yazılan 10 noyabr günü. Azərbaycan, Rusiya prezidentləri və Ermənistanın Baş nazirinin birgə imzaladıqları bəyanatla, terrorçu erməni siyasi rəhbərliyi kapitulyasiya sənədini imzaladı. Düşmən həm ağır məğlubiyyətin, həm də başının üzərində dəmir yumruğun zərbəsini hiss edərək rəzil sonluqla barışmalı oldu. Beləliklə, Prezident İlham Əliyevin hələ Vətən müharibəsinin ilk günlərində bəyan etdiyi şərtlər öz haqlı təsdiqini tapdı.
Hərbi qələbəmizin davamını siyasi uğurumuzla tamamlayaraq Ağdamı, Kəlbəcəri şəhid vermədən, bir güllə belə atılmadan kafirlərdən azad etdik.
1 dekabr isə müqəddəs bayrağımızın Laçında dalğalanacağı tarixi gündür.
28 il bundan əvvəl günəşli May günündə Ermənistanın hərbi təcavüzü nəticəsində işğal olunan Laçın, artıq azaddır!
İndi təkcə Laçın və laçınlılar deyil, həm də çoxsaylı dünya və yerli əhəmiyyətli tarixi-dini abidələr, tarixi-memarlıq abidələri, ziyarətgahlar rayonun dəyişmiş coğrafi adları da azadlığa çıxdı.
Qarabağın laçın oğlanıdır, Laçın! O da Şuşa kimi əlçatmaz dağlıq ərazidə yerləşir. Şuşa qalasının Ağoğlan qapısı olubsa, Laçının da VI əsrə aid Alban Ağoğlan məbədi olub.
Şuşa və Laçını bir araya ona görə gətirdim ki, bütün rayonlarımızın azadlığı məhz Şuşadan keçirdi. Bundan öncə azad olunan Ağdamın da, Kəlbəcərin də, Laçının da...
Hər bir daşının, qayasının qorunması vacib olan Qarabağ diyarı şükür olsun ki, artıq azaddır. Daha bu yurdun havası yad nəfəsində boğulmayacaq. Daha torpaq nisgili, yurd həsrəti ilə heç kəs dünyadan köçməyəcək.
İndi Laçının qədim sakinləri Dəmir ağac meşəsinin qonağı olacaq. Uzun illərin vətənsizlik yanğısına mineral bulaqlardan süzülən su ilə sərinlik gətirəcək, cürbəcür dərman bitkiləri isə onların yaralarına məlhəm olacaq.
80 mindən çox laçınlının daxilində daşıdığı vətən parçası artıq rayonlarının azad olunması ilə vətən bütövlüyünə çevrildi. İndi hər bir laçınlı daxilində böyük bir Laçın daşıyır.
Əsgər İsmayılov, BDU-nun Jurnalistika fakültəsinin tələbəsi
Ən son xəbərləri səhifəmizdən də izləyin
