https://innews.az/uploads/news/2023-06/_innews_961ead3f12938ebb8495b8032_o.jpg
Bakı metropolitenində ventilyasiya qurğularının yenilənməsi tədbirləri davam etdirilir. 4 yeni ventilyatorun və 6 dempferin quraşdırılması işləri başa çatdırılıb. Daha iki köhnə ventilyatorun yeni nəsil analoqları ilə əvəzlənməsi istiqamətində işlər mərhələli şəkildə həyata keçirilir.
2022-2023-cü illərin planına uyğun, “VOM 24-R” tipli 75 kVt və “VOM 20” tipli 55 kVt gücə malik tipli havalandırma qurğuları stansiya və tunel şaxtaları üçün nəzərdə tutulub. Hazırda 4 ventilyator “Əhmədli-Həzi Aslanov” mənzili, “Cəfər Cabbarlı” və “Xətai” (2 ədəd) stansiyalarında quraşdırılıb. Daha 2 ventilyatorun “Əhmədli-Həzi Aslanov” və “Qara Qarayev-Neftçilər” mənzillərində quraşdırılması üçün hazırlıqlara başlanılıb.
Yeni ventilyatorların quraşdırılmazdan əvvəl köhnəsi sökülməklə beton özül təbəqəsi dağıdılır. Daha sonra quraşdırılacaq ventilyatorun texniki tələblərinə uyğun yeni təməl meydança yaradılır. Bu zaman ventilyatorun maksimum faydalı işləməsi üçün özül təbəqənin hündürlüyü müvafiq standartlara uyğunlaşdırılır. Yalnız bundan sonra yeni ventilyator quraşdırılır.
“Bakı Metropoliteni” QSC-nin dünya istehsalçıları arasında apardığı monitorinq və müvafiq qiymətləndirmənin nəticəsi kimi, son illərdə havalandırma qurğuları Rusiyanın Artyomovsk şəhərində yerləşən “Ventprom” maşınqayırma zavodundan alınır.
Dünyada bu sahədə fəaliyyət göstərən müəssisələr arasında Rusiya şirkətinin ventilyatorları keyfiyyəti, texniki parametrləri ilə digər analoqlarından üstünlüyü və səmərəsi ilə seçilir. Avadanlıq iqtisadi cəhətdən də daha münasib olmaqla yanaşı, texniki qulluğu və təmir-təftişi daha rahat, asandır. Elektrik enerjisinə daha çox qənaət edir və idarəetmə dolabları tezlik çeviricilidir. Şirkət servis qulluğunu digər əcnəbi istehsalçılarla müqayisədə bir neçə dəfə tez - iki həftə ərzində yerinə yetirir. Həmçinin server qulluğu daha sadə və asandır. İstehsal zamanı texniki tapşırıqlarda Bakının iqlim şəraiti, metropolitenin geoloji, infrastruktur şəraiti və digər məsələlərə diqqət edilməsi də nəzərə alınıb.
2019-2021-ci illərdə metropolitendə quraşdırılmış 17 yeni ventilyator müsbət nəticələrini verir. Əvvəlki analoqları ilə müqayisədə, yeni ventilyatorlar daha güclü və məhsuldar olmaqla, quraşdırılacağı stansiya və tunelləri 2-3 dəfə artıq təmiz hava kütləsi ilə təmin edir. Onların idarə edilməsi də müasir dövrün tələblərinə uyğun, mərkəzləşmiş qaydada dispetçer tərəfindən aparılır. Bu isə ventilyatorun iş rejiminin ən qısa müddətdə dəyişdirilməsinə və operativ işinin qurulmasına zəmin yaradır. Beləliklə, ventilyatorların işinin təşkilində təhlükəsizlik yüksək səviyyədə artırılıb, xüsusən fövqəladə hallarda rejimdən rejimə daha sürətli və çevik keçid imkanları yaradılıb. Bu məqsədlə fiberoptik kabelləşmədən və müasir texnoloji idarəetmə şkaflarından istifadə olunur. İdarəetmə dolabları və sistemlər "Siemens", "Schneider", ETON kimi aparıcı istehsalçıların elektron avadanlıqları ilə qurulub.
Yeni ventilyatorların tətbiq edildiyi sahələrdə havanın hərarəti 3 dərəcəyədək aşağı salınıb.
Dempferlərin tətbiqinə isə 2019-cu ildən başlanılıb. 2022-2023-cü illərin planına uyğun olaraq, hündürlüyü 2, eni 2.5 m olan dempferlər “Azadlıq prospekti”, “Xalqlar dostluğu”, “Neftçilər”, “Nərimanov”, “Gənclik” və “Əhmədli” stansiyalarının şaxtalarında qurulub.
Quruluşca sadə olan dempferlər təbii hava axınının tənzimlənməsi və düzgün yönləndirilməsində, həmçinin bu imkanlardan geniş istifadə olunmasında xüsusi əhəmiyyət kəsb edir. Bu günə qədər Yaşıl və Qırmızı xətlərdə 15 dempfer quraşdırılıb. Müqayisə üçün deyək ki, Bənövşəyi xətdə bu sistemlər layihələndirmə mərhələsində nəzərdə tutularaq tətbiq edilir. Hazırda bu xətt üzrə 86 dempfer istismardadır.
Ən son xəbərləri səhifəmizdən də izləyin
